મુંબઈ : શિવસેનામાં એકનાથ શિંદેના વિદ્રોહ પછી ઠાકરે સરકાર હચમચી ગઈ છે,ત્યારે હવે શિવસેનાની મુખ્ય તોપ તરીકે ઓળખાતા સંજય રાઉતને મની લોન્ડરીંગ મામલે એન્ફોર્સમેન્ટ ડિરેકટોરેટ(ઈડી)એ સમન્સ આપ્યા છે.રાઉતને મંગળવારે સવારે ૧૧ વાગ્યે પૂછપરછ માટે હાજર થવાનો આદેશ આપવામાં આવ્યો છે.આમ હવે સંજય રાઉત સામે ઈડી દ્વારા કાર્યવાહી કરવામાં આવશે એવી ચર્ચાએ જોર પકડયું છે.બીજી તરફ રાઉતે સમન્સને કાવતરું ગણાવ્યું છે અને જોઈએ તો’મારી ધરપકડ કરો’એવા પડકાર સામે પોતે ઈડી સમક્ષ હાજર થવાના નથી એમ સ્પષ્ટ કહ્યું છે.
મહારાષ્ટ્રમાં મોટી રાજકીય ગતિવિધિઓ થઈ રહી છે.અમે બાળાસાહેબના શિવસૈનિકો એક મોટી લડાઈ લડી રહ્યા છીએ.આ મને રોકવાનું ષડયંત્ર છે.જો તમે મારું શિરચ્છેદ કરશો તો પણ હું ગુવાહાટીના માર્ગે નહીં જાઉં.મારી ધરપકડ કરો,જય હિંદ એમ સંજય રાઉતે ટ્વિટર પણ જણાવ્યું હતું.એપ્રિલમાં ઈડીએ તપાસ હાથ ધરી સંજયની પત્ની વર્ષા રાઉત તેના બે સાથીદારની રૃ.૧૧.૧૫ કરોડથી વધુની સંપત્તિ અસ્થાયી રૃપે જપ્ત કરી હતી.
ગોરેગામના સિધ્ધાર્થનગરની’પત્રા ચાળ’ની જમીનના એક હજાર ૩૪ કરોડ રૃપિયાના કૌભાંડમાં ઈડીએ ગત ફેબુ્રઆરીમાં રાઉતના નજીકના સાથીદાર અને બિઝનેસમેન પ્રવીણ રાઉતની ધરપકડ કરી હતી. પાલઘરના સફાળે ખાતે પ્રવીણ રાઉતને રિયલ એસ્ટેટનો વ્યવસાય છે.અગાઉ ઈડીએ સંજય રાઉતની સંપત્તિ જપ્ત કરી એમાં દાદર આવેલા રાઉતના ફલેટ તથા અલીબાગના આઠ પ્લોટનો સમાવેશ હતો. પીએમસી બેન્ક કૌભાંડમાં ઈડીએ પ્રવીણની ૭૨ કરોડ રૃપિયાની કિંમતની માલમત્તા જપ્ત કરી હતી.એચડીઆઈએલના રાકેશ વાધવાન અને સારંગે કરજ લઈ પીએમસી બેન્ક સાથે કરોડો રૃપિયાની છેતરપિંડી કરી હોવાનો આરોપ છે.આ પિતા,પુત્રની ધરપકડ કરાઈ હતી.પીએમસી બેન્કના ૯૦ કરોડ રૃપિયા ચાઉં કરી ગયા હોવાનો પ્રવીણ પર આરોપ છે.
સાંસદ સંજય રાઉતની પત્ની વર્ષા રાઉતના ખાતામાં પ્રવીણની પત્ની માધુરી રાઉતના ખાતામાંથી પંચાવન લાખ રૃપિયા ટ્રાન્સફર કરાયા હતા.આ મામલામાં વર્ષા રાઉતને ઈડીએ નોટીસ આપી પૂછપરછ કરી હતી.પત્રાચાલ કૌભાંડના પૈસાથી અલીબાગમાં માલમત્તા ખરીદવા આવી હોવાની ઈડીને શંકા છે.હવે ઈડીએ સંજય રાઉતનું આવતીકાલે નિવેદન નોંધવા સમન્સ આપ્યા છે.પૂર્વનિયોજીત કાર્યક્રમ મુજબ મારી અલીબાગમાં સભા છે.આથી ઈડી પાસે વધુ સમય માગી પૂછપરછ માટે હાજર થઈશ એમ સંજય રાઉતે કહ્યું હતું.સંજય રાઉતના સાથીદાર પ્રવીણ રાઉતને સંડોવતું પત્રા ચાલ કૌભાંડ શું છે?
શિવસેનાના સાંસદ સંજય રાઉતના નિકટના સાથીદાર પ્રવીણ રાઉત આશિષ કન્સ્ટ્રકશન પ્રાઈવેટ લિમિટેડનો અગાઉ ડાયરેક્ટર હતો. તે પત્રાચાલ રિડેવલપમેન્ટ પ્રોજેક્ટ સાથે સંકળાયેલા છે.ઈડીએ જપ્ત કરેલી અલીબાગમાં કિહિમ બીચ પરના આઠ પ્લોટ વર્ષા રાઉત અને સુજીત પાટકરની પત્ની સ્વપ્ના પાટકર દ્વારા સંયુક્ત રીતે રાખવામાં આવ્યા હતા.ઈડીની માહિતી મુજબ સુજીત પાટકર સંજય રાઉતનો નજીકનો સહયોગી છે.ઈડી સંજય રાઉતને પ્રવીણ રાઉત અને પાટકર સાથેના તેમના’વ્યવસાય અને અન્ય’સંબંધો વિશે અને તેની પત્ની સાથે સંકળાયેલા મિલકતના આર્થિક વ્યવહાર વિશે પણ પૂછપરછ કરવા માગે છે.
