– સંજય રાઉતે પોતાના લેખના માધ્યમથી ED પર પણ નિશાન સાધ્યું હતું
મુંબઈ, તા. 08 ઓગષ્ટ 2022, સોમવાર : શિવસેના નેતા અને રાજ્યસભા સાંસદ સંજય રાઉત EDની કસ્ટડીમાં છે. બીજી તરફ EDની કસ્ટડીમાં રહીને તેમણે શિવસેનાના મુખપત્ર ‘સામના’માં એક લેખ લખ્યો છે અને તેના કારણે તેમની મુશ્કેલી વધી શકે છે. EDનું કહેવું છે કે, સંજય રાઉત જેલમાંથી કોલમ નહીં લખી શકે અને ED આ મામલે તેમની પૂછપરછ કરશે કે આ લેખ તેમણે પોતે લખ્યો છે? સંજય રાઉત શિવસેનાના મુખપત્ર સામનાના મુખ્ય કાર્યકારી સંપાદક છે.
સંજય રાઉતે પોતાના લેખના માધ્યમથી મહારાષ્ટ્રના ગવર્નર ભગત સિંહ કોશ્યારી પર નિશાન સાધ્યું છે. સંજય રાઉતે રાજ્યપાલ ભગત સિંહ કોશ્યારી દ્વારા ગુજરાતીઓ અને મરાઠીઓ પર આપવામાં આવેલા નિવેદનને લઈને તેના પર નિશાન સાધ્યું છે. સંજય રાઉતે લખ્યું કે, ‘રાજ્યપાલનું આ નિવેદન કોઈ પણ ઉદ્દેશ્ય વગરનું કેવી રીતે હોઈ શકે છે? તેમનો કોઈ ઉદ્દેશ્ય હશે.મુંબઈના ગુજરાતી-મારવાડી સમાજના લોકોને પણ રાજ્યપાલનું આ નિવેદન પસંદ નથી આવ્યું તેમણે પણ તેમના ભાષણની નિંદા કરી છે.
થોડા દિવસ અગાઉ મુંબઈમાં એક કાર્યક્રમ દરમિયાન રાજ્યપાલ ભગત સિંહ કોશ્યારીએ ગુજરાતીઓ અને મરાઠીઓને લઈને એક નિવેદન આપ્યું હતું જેના કારણો હંગામો મચી ગયો હતો.રાજ્યપાલે કહ્યું હતું કે, ગુજરાતી અને મારવાડી લોકો મુંબઈમાં છે એટલા માટે મુંબઈને આર્થિક રાજધાનીનો દરજ્જો પ્રાપ્ત છે.જો મુંબઈમાંથી ગુજરાતી-મારવાડી લોકો ચાલ્યા જશે તો તે આર્થિક રાજધાની નહીં રહેશે.જોકે, વિવાદ વધતો જોઈ રાજ્યપાલે પોતાના નિવેદન માટે માફી માગી લીધી હતી.
સંજય રાઉતે પોતાના લેખના માધ્યમથી ED પર પણ નિશાન સાધ્યું હતું.રાઉતે લખ્યું કે, સુગર ફેક્ટ્રી, ટેક્સટાઈલ મિલ્સ અને ઉદ્યોગો જે મરાઠી લોકો દ્વારા સંચાલિત કરવામાં આવે છે તેને તપાસ એજન્સી ટાર્ગેટ કરી રહી છે. EDએ આવા ઉદ્યોગોને બંધ કરાવી દીધા છે અને મરાઠી વેપારીઓની સામે કેસ દાખલ કર્યો છે.રાજ્યપાલે તેના વિશે પણ વાત કરવી જોઈએ.
