વાહન વ્યવહાર બંધ હોવાથી પગપાળા વતન જવા રવાના
બારડોલી
લોકડાઉન દાહોદ ગોધરા અને મધ્ય પ્રદેશના બાંધકામ ઉદ્યોગ સાથે સંકળાયેલા મજૂરો માટે મુસીબત લઈને આવ્યું છે. રાજ્યમાં તમામ વાહન વ્યવહાર બંધ થઇ જતાં આ મજૂરોએ પરિવાર સાથે પગપાળા જ વતન તરફ પ્રયાણ શરૂ કર્યું છે. હજારોની સંખ્યામાં મજૂરો નેશનલ હાઇવે 48 પરથી પસાર થઈ રહયા છે. ત્યારે તંત્ર કે સ્વૈચ્છિક સંસ્થાઓ મજૂરોને વતન સુધી પહોંચાડવામાં મદદ માટે આગળ આવે તે આવશ્યક છે.
કોરોનાએ સમગ્ર વિશ્વમાં હાહાકાર મચાવી દીધો છે. ત્યારે કોરોનાના કારણે ગુજરાતમાં લગાવવામાં આવેલ લોક ડાઉન બાંધકામ ઉદ્યોગ સાથે સંકળાયેલા મજૂરો માટે આફત લઈને આવી છે. કોરોનાના કારણે બાંધકામ ઉદ્યોગ સ્થગિત થઈ ગયો છે. જેને કારણે મજૂરોને કામ પણ મળી શકતું નથી. આવા સંજોગોમાં મજૂરો તેમના કામના સ્થળોએ પણ રહી શકે એમ નથી. આથી હજારોની સંખ્યામાં મજૂરો હિજરત કરવા મજબૂર બન્યા છે. ત્યારે બીજી તરફ લોક ડાઉનને કારણે સમગ્ર રાજ્યમાં વાહન વ્યવહાર પણ બંધ કરી દેવામાં આવ્યો હોય મજૂરો પોતે ફસાય ગયા હોવાનો અનુભવ કરી રહ્યા છે. કોઇનું વતન દાહોદ તો કોઈનું ગોધરા તો કોઈ તો વળી મધ્ય પ્રદેશથી રોજગારીની શોધમાં અહીં આવ્યા હતા. પરંતુ કોરોનાએ તેઓની રોજગારી પણ છીનવી લીધી છે. અધૂરામાં પૂરું વાહન વ્યવહાર પણ બંધ હોય તેઓ વતન પણ જઈ શકે એમ નથી. વતનમાં જવાની કોઈ સુવિધા ઉપલબ્ધ ન હોય મજૂરોએ તેમના વતન તરફ પગપાળા જ સામુહિક હિજરત શરૂ કરી છે. એક હાથમાં સામાન અને બીજા હાથમાં નાનું છોકરુંનો ભાર લઈને નીકળી પડેલા સેંકડો પરિવારો રાત્રે ક્યાં રોકાશે અને ખાવા માટે શું મળશે તેની કાઈ ખબર નથી. ઉપરથી કોરોનાનો ભયના માનસિક ભાર સાથે તેઓ આગળ વધી રહ્યા છે. નાના બાળકો અને મહિલાઓ સાથે ચાલી પડેલા આ કાફલાને જોઈ પથ્થર દિલના માનવીનું પણ હૃદય કંપી ઉઠે તેવા દ્રશ્યો સર્જાય રહ્યા છે. તંત્ર પણ તેમની વ્હારે આવ્યું ન હોય તેઓ બેરોકટોક આગળ વધી રહ્યા છે. જો કોઈ સ્વૈચ્છિક સંસ્થા કે તંત્ર દ્વારા તેઓને સામુહિક રીતે વાહનો મારફત વતન સુધી પહોંચાડવામાં આવે તો ગરીબ મજૂરો પર મોટો ઉપકાર ગણાશે. રાજ્યની સંવેદનશીલ સરકાર આ તરફ પણ ધ્યાન આપી મજૂરોને વતન સુધી પહોંચાડવા સહકાર આપે તે જરૂરી છે.
