અમદાવાદ,શુક્રવાર,6 મે,2022 : ચોમાસામાં વરસાદી પાણીનો ઝડપથી નિકાલ થાય અને લોકોના ઘરોમાં પાણી બેક ના મારે જેવા કારણો આગળ ધરીને ચોમાસા પહેલા પહેલા રાઉન્ડમાં અમદાવાદ પૂર્વનાં ચાર ઝોનમાં કુલ મળીને ૨૬૯૮૭ કેચપીટ સાફ કરવામાં આવી હોવાનો તંત્ર દ્વારા દાવો કરવામાં આવ્યો છે.દર વર્ષે તંત્ર તરફથી શહેરના અલગ અલગ ઝોન અને તેના વિસ્તારોમાં કેચપીટ સાફ કરાઈ હોવાના દાવા કરાય છે.આમ છતાં સામાન્ય એવા વરસાદમાં પણ તંત્રે કરેલી કામગીરીની પોલ ખુલી જાય છે.
મ્યુનિ.સત્તાધીશોના દાવા પ્રમાણે, પહેલા રાઉન્ડમાં પૂર્વ ઝોનમાં અગાઉની ૬૧૯૬ અને નવી ૨૧૮ કેચપીટ સાફ કરવામાં આવી છે.ઉત્તરઝોનમાં અગાઉની ૭૧૦૬ અને નવી ૫૮૮ કેચપીટ સાફ કરવામાં આવી છે.દક્ષિણ ઝોનમાં અગાઉની ૭૪૪૯ અને નવી ૫૪૭ કેચપીટ સાફ કરવામાં આવી છે.જયારે મધ્યઝોનમાં અગાઉની ૬૨૩૬ અને નવી ૨૨ કેચપીટ સાફ કરવામાં આવી છે.ઉપરાંત આ તમામ કેચપીટોને બીજા રાઉન્ડમાં પણ સાફ કરવામાં આવશે.અમદાવાદ પૂર્વના ચાર ઝોન પૈકી પૂર્વઝોનના ૧૭ ડ્રેનેજ પમ્પિંગ સ્ટેશનમાં,ઉત્તરઝોનના ૨૯, દક્ષિણઝોનના ૩૫ તથા મધ્યઝોનના ૧૨ ડ્રેનેજ પમ્પિંગ સ્ટેશનમાં જાળી સફાઈ તેમજ વેટવેલની સફાઈ પહેલા રાઉન્ડમાં કરવામાં આવી હોવા અંગે તંત્ર તરફથી દાવો કરવામાં આવ્યો છે.
