– રાજકોટ નિર્માણાધીન એરપોર્ટના કામની સમીક્ષા માટે મુખ્યમંત્રીના કાર્યક્રમમાં આમંત્રિત કરાયેલા પત્રકારોને ડીસીપીએ હડધૂત કરી અટક કરી!
રાજકોટ,તા. 3 જુન 2022,શુક્રવાર : સત્તાના મદમાં અંધ બનીને કોઈ કારણ વગર સમગ્ર પત્રકાર આલમનું ઘોર અપમાનનો ગંભીર ઘટના આજે રાજકોટ નજીક હીરાસર ખાતે મુખ્યમંત્રીની સ્થળ વિઝીટ વખતે બનતા ભારે આક્રોશ જાગ્યો છે.સરકારના માહિતી ખાતા દ્વારા પહેલા પત્રકારોને સર્કિટહાઉસથી ખાસ વાહનમાં વિધિવત્ આમંત્રણ આપીને હીરાસર લઈ જવાયા અને ત્યાં પહોંચ્યા બાદ પત્રકારો રૂટીન પ્રમાણે વિડીયો શૂટીંગ કરતા હતા ત્યાં ડી.સી.પી.પ્રવિણ મીણાએ પત્રકારો સાથે ઉધ્ધત વર્તન કરીને માત્ર અપમાનિત જ ન કર્યા પણ પત્રકારો,કેમેરામેનના બાવડાં પકડી,ધક્કા મારીને તમારી અટક કરાઈ છે તેમ કહી પોલીસ વાનમાં ધકેલી દીધાની ઘટનાએ ભારે ચકચાર જગાવી છે.
પત્રકારોએ જણાવ્યું કે અમે શોખથી ત્યાં ગયા ન્હોતા પણ ખુદ સરકાર તરફથી જ અમને મુખ્યમંત્રીની એરપોર્ટ વિઝીટના કાર્યક્રમનું કવરેજ કરવા માટે આમંત્રણ અપાયું હતું જે અન્વયે અમે ફરજ બજાવવા ત્યાં પહોંચ્યા હતા.અમારુ વાહન જ્યાં ઉભું રખાયું ત્યાં અમે કવરેજ કરવાનું શરુ કરીએ ત્યાં ડી.સી.પી. પ્રવિણ મીણા અને સાથેના પોલીસ કર્મી ધસી આવીને અમે કોઈ મોટા ગુનેગાર હોય તેવું વર્તન કર્યું હતું.
ગંભીર વાત એ છે કે જિલ્લા કલેક્ટર અરૂણ મહેશ બાબુની સ્થળ પર હાજરી છતાં તે પોલીસનું આવું અનુચિત,ગેરકાયદેસર કૃત્યને અટકાવી શક્યા ન્હોતા. પત્રકારો,કેમેરામેનને પોલીસવાનમાં ધકેલાઈ રહ્યા હતા ત્યારે ભાજપના સિનિયર પ્રવક્તા રાજુ ધ્રુવ ત્યાં વાનના દરવાજા પાસે જ ઉભા ઉભા તમાશો જોતા હતા.
આ ઘટનાની પછી ગંભીરતા સમજાતા ખુદ મુખ્યમંત્રી ભુપેન્દ્ર પટેલે બે હાથ જોડીને આવી ઘટના ન બનવી જોઈએ તેમ કહીને હું દિલગીરી વ્યક્ત કરું છું તેમ કહ્યું હતું અને ફરીવાર આવી ઘટના ન બને તે માટે પગલા લેવાશે તેવી પત્રકારોને ખાત્રી આપી હતી. મંત્રી અરવિંદ રૈયાણીએ પણ પત્રકારોની માફી માગી હતી.કલેક્ટર આવી ઘટના અટકાવવામાં નિષ્ફળ રહ્યા બાદ મુખ્યમંત્રી સમક્ષ પત્રકારો રજૂઆત કરતા હતા ત્યારે તેમને શાંત પાડવાનો પ્રયાસ કરતા હતા.
ઉલ્લેખનીય છે કે આ પહેલા આટકોટ ખાતે વડાપ્રધાન નરેન્દ્ર મોદીનો કાર્યક્રમ યોજાયો ત્યારે પણ પત્રકારોને ત્યાં લેખિત આમંત્રણ અપાયા હતા અને વડાપ્રધાનની વાત લોકો સુધી પહોંચાડવા પત્રકારો ત્યાં પહોંચ્યા ત્યારે પ્રિન્ટ મિડીયાના પત્રકારો માટે અનેક લાઈન પછી દૂર જગ્યા રખાઈ હતી જ્યાંથી તેઓ રિપોર્ટીંગ જ કરી શકે નહીં.આ અન્વયે કેટલાક પત્રકારોએ સ્ટેજ પાસે ઉભી કરાયેલી રેલીંગની પાસે જમીન પર ધરણાં પર બેસી ગયા હતા અને બાદમાં ખુરશીની વ્યવસ્થા કરાઈ હતી.
પત્રકારોએ કહ્યું કે આમંત્રણ આપીને અપમાન કરવાનો આ સિલસિલો ચાલી રહ્યો છે, જો મિડીયામાં કવરેજની જરૂર ન જણાતી હોય તો આમંત્રણ શા માટે અપાય છે.શુ પોલીસ કર્મચારી મુખ્યમંત્રી સહિત ભાજપના ટોચના નેતાઓથી પણ ઉપરવટ જઈને કામ કરી શકે ખરાં? આવા ડી.સી.પી.થી શહેર પોલીસની છાપ ખરડાય તેમ હોય તેમને પદ પરથી હટાવવા,કાયદેસરના પગલા લેવા માંગ કરાઈ હતી.
છેલ્લે મળતા અહેવાલો પ્રમાણે બપોરે મોડેથી પત્રકારો ગેરકાયદેસર રીતે ગેરવર્તન કરનાર DCP સામે પગલાં લેવાની માગણી સાથે પત્રકારો રાજકોટ પોલીસ કમિશનર કચેરીએ ધરણા પર બેસી ગયા હતા.
