આમ આદમી પાર્ટી ગુજરાતમાં સરકારી શાળાઓની હાલતને ચૂંટણીમાં મહત્વનો મુદ્દો બનાવવા માગતી હોય તેમ નાગરિકોને પોતાના વિસ્તારની ખરાબ સરકારી શાળાઓનો વીડિયો ઉતારીને તેમજ ફોટો પાડીને આપ દ્વારા જાહેર કરાયેલા વોટ્સ એપ નંબર પર મોકલવા જણાવ્યું છે.આપ દ્વારા વડાપ્રધાન નરેન્દ્ર મોદી આગામી સપ્તાહે ગુજરાતની મુલાકાત લેવાના છે ત્યારે નાગરિકોએ મોકલેલી માહિતી મીડિયા અને સોશિયલ મીડિયા થકી સરકારી શાળાઓની વાસ્તવિક સ્થિતિ મોદી સુધી પહોંચાડવામાં આવશે તેવો દાવો કરાયો છે.શિક્ષણ મંત્રી જીતુ વાઘાણી પીએમને ખરેખર સ્થિતિ નહીં દર્શાવે અને બે-પાંચ સારી સરકારી શાળાઓ બતાવી દેશે તેવો આક્ષેપ આપના પ્રદેશ પ્રમુખ ગોપાલ ઇટાલિયાએ કર્યો છે.ગોપાલ ઇટાલિયાએ મીડિયાને જણાવ્યું હતું કે સમાજ અને ધર્મના નાને રાજનીતિ બહુ ચાલી છે અને હવે લોકોને સ્પર્શતા શિક્ષણ સહિતના મુદ્દાઓ રાજનીતિમાં ઉમેરાયા છે.પીએમ મોદી સરકારી શાળાઓનું લાઇવ વીડિયો પ્રસારણ જોવાના છે ત્યારે અમને ભય છે કે તેમને બે-પાંચ સારી સરકારી શાળા બતાવીને વડાપ્રધાનને સરકારમાં જવાબદાર લોકો વાસ્તવિક સ્થિતિ દર્શાવશે નહીં.આપ દ્વારા આ માટે ૯૫૧૨૦૪૦૪૦૪ વોટ્સ એપ નંબર જારી કરાયો છે.જેની ઉપર ગુજરાતના નાગરિકો પોતાના ગામ-શહેરની કે વિસ્તારની ખરાબ અને ખંડેર જેવી સરકારી સ્કૂલો હોય તેના ફોટો અને વીડીયો મોકલવા અપીલ કરવામાં આવી છે.લોકો જે ફોટા કે વીડિયો મોકલશે તે પીએમ મોદી સુધી પહોંચાડવામાં આવશે તેવો દાવો પણ ઇટાલિયાએ કર્યો છે.રાજ્યમાં સરકારી શાળાઓની હાલત કેવી છે અને તે માટે સરકારમાં જેમની જવાબદારી છે તેઓ કેટલા સફળ છે તે બાબત પણ રજૂ કરવામાં આવશે.
હાર્દિક પટેલને આપમાં જોડાવવા ઇટાલિયાનું આમંત્રણ
આપના ગોપાલ ઇટાલિયાએ કોંગ્રેસના નેતા હાર્દિક પટેલને લઇ ચાલતા વિવાદ અંગે આપમાં જોડાવવા આમંત્રણ આપ્યું છે.તે સાથે નરેશ પટેલ સહિતના જે અગ્રણી આપની લડાઇમાં જોડાવવા તૈયાર હોય તેમનું સ્વાગત હોવાનું કહ્યું છે આગામી વિધાનસભાની ચૂંટણી ગુજરાતની જનતા અને ભાજપના અહંકાર વચ્ચેની રહેશે તેમ પણ કહ્યું હતું.રાજકોટ જીલ્લા કોંગ્રેસનાં મહામંત્રી અને કોળી સમાજના અગ્રણી મુકેશ રાજપરા આપમાં જોડાયા હતા.
