– ગરબાનાં પાસમાંથી પણ GST વસુલ કરવાની જાહેરાત કરાતા આમ આદમી પાર્ટીનાં આગેવાનો અને કાર્યકરો મેદાને આવ્યા હતાં
– વિવિધ બેનરોની સાથે સૂત્રોચ્ચાર કરી ઉગ્ર વિરોધ પ્રદર્શન કરી રહેલા આપના 40 જેટલા આગેવાનો અને કાર્યકરોની પોલીસે અટકાયત કરી
તાજેતરમાં સરકાર દ્વારા ગુજરાતની પરંપરા ગણાતા ગરબાનાં પાસમાંથી પણ GST વસુલ કરવાની જાહેરાત કરવામાં આવી છે.જેને લઈને લોકોમાં ભારે રોષની લાગણી જોવા મળી રહી છે.ત્યારે લોકોના આ રોષને વાચા આપવા માટે આજે આમ આદમી પાર્ટીનાં આગેવાનો અને કાર્યકરો મેદાને આવ્યા હતાં અને આ મુદ્દે વિવિધ બેનરોની સાથે સૂત્રોચ્ચાર કરી ઉગ્ર વિરોધ પ્રદર્શન કરવામાં આવ્યું હતું.જો કે પોલીસે દેખાવો કરી રહેલા આમ આદમી પાર્ટીનાં નેતાઓ અને કાર્યકરોની ટીંગાટોળી સાથે અટકાયત કરી હતી.
આજરોજ રાજકોટ શહેરનાં કિસાનપરા ચોકમાં આમ આદમી પાર્ટીનાં આગેવાનો
અને કાર્યકરો મોટી સંખ્યામાં એકઠા થયા હતા.અને વિવિધ બેનરો સાથે ગરબાના પાસમાં જીએસટી લાગુ કરવા મામલે વિરોધ દર્શાવ્યો હતો.આ તકે ‘આપ’ આગેવાનો દ્વારા ભાજપ સરકાર વિરોધી સૂત્રોચ્ચાર પણ કરવામાં આવ્યા હતા.અને ગરબામાં લગાવેલો GST પરત ખેંચવાની માંગ કરવામાં આવી હતી.
‘આપ’ આગેવાનોએ જણાવ્યું હતું કે, હિન્દુત્વનાં મોટા બણગા ફૂંકતી ભાજપ સરકારે હિન્દુઓનાં મહત્વનાં તહેવાર એવા નવરાત્રીનાં ગરબામાં પણ GST લગાવી લોકોને લૂંટવાનો નવો કારસો ઘડયો છે.સામાન્ય રીતે ખેલૈયાઓ મોટી સંખ્યામાં આ તહેવારોમાં ગરબે ઘૂમી માતાજીની આરાધના કરતા હોય છે.ત્યારે તેના ઉપર લગાવેલો GST સત્વરે પરત નહીં ખેંચાય તો વધુ ઉગ્ર આંદોલન કરવામાં આવશે.આમ આદમી પાર્ટીનાં આ વિરોધ અંગેની જાણ થતાં સ્થાનિક પોલીસ દોડી ગઈ હતી.તેમજ સૂત્રોચ્ચાર સહિતનાં દેખાવો કરી રહેલા આગેવાનો તેમજ કાર્યકરોની અટકાયતનો પ્રયાસ કરતા પોલીસની સાથે ઘર્ષણનાં દ્રશ્યો સર્જાયા હતા.જોકે ત્યારબાદ પોલીસે ટીંગાટોળી કરી ‘આપ’નાં 40 જેટલા કાર્યકરોની અટકાયત કરી હતી.
