સાપુતારા : ગિરિમથક સાપુતારા ખાતે આવેલા સાંદીપનિ વિદ્યા સંકુલ ખાતે ગુજરાત રાજ્યના શિક્ષણ મંત્રી શ્રી જીતુભાઇ વાઘાણીએ સાયન્સ સેન્ટર અને સેન્ટ્રલ લાઈબ્રેરીનુ ઉદ્ઘાટન કર્યુ હતુ.શ્રી ભારતીય સંસ્કૃતિ સંવર્ધન ટ્રસ્ટ-પોરબંદર સંચાલિત,સાંદીપનિ વિદ્યા સંકુલ-સાપુતારા ખાતે આવેલ માધ્યમિક અને ઉચ્ચતર માધ્યમિક શાળામા અદ્યતન ટેકનોલોજી ધરાવનાર સાયન્સ સેન્ટર અને સેન્ટ્રલ લાયબ્રેરીના ઉદ્ધાટન વેળા મંત્રીશ્રી સાથે પૂજ્ય શ્રી રમેશભાઈ ઓઝા વિશેષ ઉપસ્થિત રહ્યા હતા.
સાંદીપનિ વિદ્યા સંકુલ સાપુતારા છાત્રાપર્ણ પ્રસંગે મંત્રી શ્રી જીતુભાઇ વાઘાણીએ જણાવ્યુ હતુ કે,ડાંગ જેવા અંતરિયાળ વિસ્તારમા શિક્ષણ,સંસ્કાર અને સંસ્કૃતિની જાગૃતિ લાવવાનુ કામ,વિદ્યા સંકુલ દ્વારા કરવામા આવી રહ્યું છે.આ સંસ્થાઓ સરકારનુ કામ હળવુ કરી રહ્યા છે.આદિવાસી સમાજના વિદ્યાર્થીઓનુ જીવન ધોરણ આર્થિક અને શૈક્ષણિક રીતે ઊંચું આવે તે માટે આ સંસ્થાઓ પ્રયાસ કરી રહી છે.મંત્રીશ્રીએ ડાંગ જિલ્લાના પ્રખ્યાત ડાંગી નૃત્યને હિન્દૂ સંસ્કૃતિનુ પ્રતિક ગણાવ્યુ હતુ.
મંત્રીશ્રીએ સાંદીપનિ વિદ્યા સંકુલ સાપુતારાના ટ્રસ્ટીઓને શ્રેષ્ઠ કામગીરી બદલ અભિનંદન આપ્યા હતા.અહીં વિદ્યાર્થીઓને શ્રેષ્ઠ શિક્ષણ અને તમામ પ્રયાસની સુવિધાઓ આપવાનો પ્રયાસ કરવામા આવે છે. ગુજરાત સરકારની વિજ્ઞાન અને ઔધોગિક ક્ષેત્રની સિદ્ધિઓને વર્ણવતા મંત્રી શ્રી જીતુભાઇ વાઘાણીએ કહ્યુ હતુ કે,દુબઈ કરતા પણ સારી સુવિધાઓ ધરાવનાર સાયન્સ સીટી અમદાવાદ ખાતે તૈયાર કરવામા આવેલ છે.આ સાયન્સ સીટી એશિયાની હબ બની છે જ્યા વિદ્યાર્થીઓએ અચૂક મુલાકાત કરવી જોઈએ.
સાંદીપનિ વિદ્યા સંકુલ ખાતે સાયન્સ સેન્ટર અને સેન્ટ્રલ લાઈબ્રેરીના છાત્રાપર્ણ કાર્યક્રમ પ્રસંગે,ડાંગ જિલ્લા પંચાયત પ્રમુખ શ્રી મંગળભાઈ ગાવીતે અભ્યર્થના વ્યક્ત કરી હતી કે,સાપુતારા સાંદીપનિ વિદ્યા સંકુલ જેવી અદ્યતન ટેકનોલોજી ધરાવનાર શાળાઓ ડાંગના દરેક વિસ્તારમા બને.ધારાસભ્ય શ્રી વિજયભાઈ પટેલે આ પ્રસંગે અદ્યતન ટેકનોલોજીથી તૈયાર થયેલ સાયન્સ સેન્ટર માટે સંસ્થા,અને ટ્રસ્ટીઓને અભિનંદનનિ સાથે આભાર વ્યક્ત કર્યો હતો.સાંદીપનિ વિદ્યા સંકુલ સાપુતારા છાત્રાપર્ણ કાર્યક્રમમા જિલ્લા શિક્ષણ અધિકારી શ્રી એમ.સી.ભૂસારા, ડાંગ ભાજપ પાર્ટી પ્રમુખ શ્રી દશરથભાઈ પવાર,સાપુતારા હોટેલ એસોસિએશનના સેક્રેટરી શ્રી તુકારામ કરડીલે,શિક્ષકો તેમજ વિદ્યાર્થીઓ ઉપસ્થિત રહ્યા હતા.
