– સાઉથની અનેક ફિલ્મોમાં દાઉદ ગેન્ગનું રોકાણ
– એનઆઈએની તપાસમાં પર્દાફાશ : છોટા શકીલના પરિવારની અભિનેત્રી દક્ષિણની ફિલ્મોમાં સક્રિય
મુંબઈ,તા.17 જાન્યુઆરી 2023,મંગળવાર : બોલીવૂડ બાદ હવે દાઉદ ઈબ્રાહિમની ડી-ગેન્ગે સાઉથના ટોલીવૂડમાં પગપેસારો કર્યો હોવાની હકીકતનો એનઆઈએની તપાસમાં પર્દાફાશ થયો છે.છેલ્લા કેટલાય સમયથી સાઉથ ઈન્ડિયન ફિલ્મો સુપરહિટ થઈ રહી છે.સાઉથની ફિલ્મો ભારતભરમાં લોકપ્રિય થવાની સાથે કરોડોની કમાણી કરી રહી છે.તેેને લીધે દાઉદ ગેંગ સાઉથની ફિલ્મોમાં પણ સક્રિય થઈ રોકાણો કરી રહી છે અને પોતાના માનીતા લોકોને કામ અપાવી રહી છે.
સાઉથની ફિલ્મ ઈન્ડસ્ટ્રીએ બોલીવૂડને ક્યાંય પાછળ રાખી દીધું છે અને ટોલીવૂડની ફિલ્મો કરોડોની કમાણી કરવા લાગી છે.એટલે જ દાઉદની દાઢ સળકી છે.એનઆઈએની તપાસમાં એવું જાણવા મળ્યું હતું કે દાઉદના સાગરીત છોટા શકીલે પોતાના સગા- વ્હાલા મારફત દક્ષિણની ફિલ્મોમાં રોકાણ કર્યું છે.સાઉથના કેટલાક ટોચના એકટરોનો પણ ડી-ગેન્ગ સાથે સંબંધ હોવાની શંકા છે.છોટા શકીલના પરિવારની એક અભિનેત્રી દક્ષિણની ફિલ્મોમાં સક્રિય છે.છોટા શકીલના સાળાની બીજી પત્નીની આ પુત્રી સાઉથની અનેક હિટ ફિલ્મોમાં કામ કરી ચૂકી છે.
એનઆઈએ દ્વારા ડી-ગેન્ગ તરફથી સાઉથમાં કરવામાં આવેલા મૂડીરોકાણ,દક્ષિણના એકટરોનો ડી-ગેન્ગ સાથે સંબંધ વગેરે બાબતોની તપાસ ચાલુ રાખવામાં આવી છે.
