સાયણગામે ધાબા ઉપર સુવા ગયેલ યુવાનના મોબાઈલ ફોનની ચોરી

બારડોલી : સુરત જિલ્લાના ઓલપાડ તાલુકાનાં સાયણ ગામે આવેલ સિદ્ધિ વિનાયક રેસિડન્સીમાં રહેતો યુવાન રાત્રિના સમયે ધાબા ઉપર સુવા ગયો હતો.તે સમયે કોઈ અજાણ્યો તસ્કર યુવાનના મોબાઈલની ચોરી કરી ગયો હતો.પ્રાપ્ત માહિતી મુજબ ઓલપાડ તાલુકાનાં સાયણ ગામે સિદ્ધિ વિનાયક રેસિડન્સીમાં રહેતા હર્ષવર્ધન રાઘવેન્દ્રકુમાર શુક્લા(ઉ.વ.20)કે જેઓ છૂટકમાં ફેરી કરી કપડાનું વેચાણ કરી ગુજરાન ચલાવે છે.જેઓ ગત તા-23 મે ના રોજ કઠોર આંબોલી વિસ્તારમાં કપડાનો વેપાર કરી રાત્રિના 10:30 વાગ્યે ઘરે પરત ફર્યો હતો અને રાત્રિના જમી પરવારીને ધાબા ઉપર સૂતો હતો.તેની સાથે સોસાયટીના અન્ય કેટલાક લોકો પણ સૂતા હતા.રાત્રિના સમયે કોઈ અજાણ્યો તસ્કર આ હર્ષવર્ધનના મોબાઈલ ફોનની ચોરી કરી ગયો હતો.વહેલી સવારે યુવાને જાગીને જોતાં તેનો મોબાઈલ ફોન નજરે ન પડતાં તેણે શોધખોળ કરી હતી પરંતુ ભાળ ન મળતા તેણે આખરે ઓલપાડ પોલીસ સ્ટેશનમાં ફરિયાદ નોંધાવી છે.