સુરત,તા.25 જાન્યુઆરી 2023,બુધવાર : દિલ્હીમાં કંઝાવાલા હીટ એન્ડ રનની ઘટનામાં હજુ પોલીસની તપાસ આગળ વધી રહી છે તે સમયે જ સુરતમાં બાઈક પર જઈ રહેલા એક દંપતિને કારચાલકે ટકકર માર્યા બાદ લગભગ 12 કી.મી. સુધી બાઈક ચાલકને ઢસડયો હતો અને બાદમાં બે દિવસ પછી યુવકનો ક્ષતવિક્ષત હાલતમાં મૃતદેહ મળ્યો હતો.આ અકસ્માતમાં બાઈક ચાલકની પત્ની પણ ઘાયલ થઈ હતી જેને સારવાર આપવામાં આવી રહી છે.
ટક્કર મારતા બાઈક કારમાં ફસાઈ ગયું હતું
18 જાન્યુ.ના બનેલી ઘટનામાં સુરતના લીંબાયત નીલગીરી સર્કલ નજીક રહેતા 24 વર્ષના સાગર પાટીલ અને તેમના પત્ની અશ્વીની પાટીલ બહુમરા ગામથી સુરત તરફ આવી રહ્યા હતા.તે સમયે તાંતીથયા પાસે એક કારચાલક પાછળથી બાઈકને ટકકર મારી હતી,જેમાં અકસ્માત બાદ યુવકના પત્ની બાઈક પરથી પડી ગયા પરંતુ સાગર પાટીલ અને તેનું બાઈક ગાડીમાં ફસાયા હતા.પોલીસે ઘટનાસ્થળે પહોંચી તપાસ હાથ ધરી છે
કાર ચાલક હજુ પણ ફરાર
કારચાલકે લગભગ 12 કી.મી. સુધી આ અકસ્માતનો ભોગ બનેલ સાગરને ઢસડયો હતો અને બાદમાં તે કાર મુકીને ફરાર થઈ ગયો હતો.અકસ્માત થયેલી કાર સુરતના સારોલી નજીકથી મળી આવી છે,જ્યારે કાર ચાલક હજુ ફરાર છે.આ અંગે પોલીસે કાર જપ્ત કર્યા બાદ અને મૃતકના પત્નીએ આપેલા નિવેદન પરથી કારચાલકની શોધખોળ શરૂ કરી છે.
