સુરત,તા.31 જાન્યુઆરી 2023,મંગળવાર : સુરત ક્રાઈમ બ્રાંચ દ્વારા શહેરમાં આંતક મચાવતી આસિફ ટામેટા ગેંગ સામે ગુજ્સીટોક હેઠળ ગુનો નોંધ્યો હતો અને આ ગેંગના 14 આરોપીની ધરપકડ કરી જેલ હવાલે કરી દેવામાં આવ્યા હતા.દરમિયાન આ ગેંગના કુખ્યાત આરોપી અજ્જુ ટામેટા પેરોલ જમ્પ કરી ફરાર થઇ ગયો હતો જેને સુરત ક્રાઈમ બ્રાંચની ટીમે ઝડપી પાડી કાયદેસરની કાર્યવાહી હાથ ધરી હતી.
સુરત શહેરમાં મુજ્જ્ફરઅલી ઉર્ફે આસિફ ટામેટા કે જે પોતાના સગીરતો સાથે મળી આશીફ ટામેટા નામની ગેંગ બનાવી હતી અને આ ગેંગના સાગરીતો ખુન,લૂંટ,ધાડ,અપહરણ, આમર્સ એક્ટ જેવા ગંભીર ગુનાઓ આચરતી હતી.જેથી આ ગેંગ વિરુદ્ધ ડીસીબી પોલીસ મથકમાં 27 નવેમ્બર 2020માં ગુજ્સીટોક હેઠળ ગુનો નોંધવામાં આવ્યો હતો અને પોલીસે આ ગેંગના 14 સાગરીતોની ધરપકડ કરી હતી.
આ ગેંગનો કુખ્યાત આરોપી અસગરઅલી ઉર્ફે અજ્જુ ટામેટા જાફરઅલી સૈયદ વચગાળાના જામીન લઇ ફરાર થઇ ગયો હતો.દરમ્યાન સુરત ક્રાઈમ બ્રાંચની ટીમે માહિતીના આધારે તેને માનદરવાજા ખાડીપુલ પાસેથી ઝડપી પાડ્યો હતો.
આરોપીએ નામદાર ગુજરાત હાઈકોર્ટમાંથી 12 ઓક્ટોબર 2022ના હુકમથી 10 દિવસની રજા મેળવી હતી.બાદમાં 13થી 14 ઓક્ટોબર 2022 સુધીની રજા મેળવી હતી.બાદમાં નામદાર ગુજરાત હાઈકોર્ટના 1 નવેમ્બર 2022ના હુકમથી 2 નવેમ્બર 2022 સુધી રજામાં વધારો કર્યો હતો પરંતુ બાદમાં 3 નવેમ્બર 2022ના રોજ તેને જેલ ખાતે હાજર થવાનું હતું પરંતુ આરોપી હાજર ન થઇ પેરોલ જમ્પ કરી ફરાર થઇ ગયો હતો.
સુરત ક્રાઈમ બ્રાંચના પીઆઈ લલિત વેગડીયાએ જણાવ્યું હતું કે આરોપી વચગાળાના જામીન લઇ બહાર આવ્યો હતો.આરોપી છેલ્લા બે મહિનાથી અલગ અલગ વિસ્તારમાં ફરતો હતો. ક્રાઈમ બ્રાંચની ટીમ તેને પકડવા માટે તપાસ કરી રહી હતી.દરમિયાન માહિતી મળી હતી કે તે તેના ઘરે આવવાનો છે જેથી તેને ઝડપી પાડી જેલ ખાતે મોકલવાની તજવીજ હાથ ધરવામાં આવી છે.
