સુરત, 1 જૂન : લાંબા સમયના લોકડાઉંન બાદ સમગ્ર દેશની સાથ સાથે ગુજરાતમાં પણ સોમવારથી અનલોક-1 નો પ્રારંભ થઇ ગયો છે.ત્યારે ઔદ્યોગિક નગરી સુરતમાં પણ સોમવાર સવારથી જ અનેક વિવિધ પ્રકારની વ્યવસાયિક ગતિવિધિઓ શરૂ થતા જ જનજીવન ફરીથી ધબકતું જોવા મળ્યું હતું. સુરત શહેરમાં આજે સીટી બસ,રીક્ષા,કાપડ માર્કેટ,હીરા બજાર સહિતના આજે નાના- મોટા વેપાર આજથી શરૂ થયા હતા.જોકે, કોરોનાની મહામારીને લઈને હજુ પણ લોકોમાં ભયનો માહોલ જોવા મળ્યો હતો.શહેરના વિવિધ વિસ્તારોમાં શરૂ થયેલી સીટી બસ અને રીક્ષાઓમાં સોસીયલ ડિસ્ટેન્સનું પાલન થતું જોવા મળ્યું હતું.ઘણા લાંબા સમય બાદ પોતાનો રોજગાર શરૂ થતા રીક્ષા ચાલકોમાં ખુશીનો માહોલ જોવા મળ્યો હતો.શહેરમાં 350 ડાઈંગ અને પ્રોસેસિંગ મિલો છે,જેમાંથી 20 મિલો શરૂ થઈ હોવાની જાણકારી મળી છે.
સવારથી જ શહેરના વિવિધ વિસ્તારોમાં આવેલી ટેક્સ્ટાઇલ માર્કેટોમાં સળવળાટ જોવા મળ્યો હતો.પરંતુ,સુરત શહેરમાંથી મોટા પાયે પોતાના વતન કારીગરો જતા રહ્યા હોઈને મિલો શરૂ કરવામાં અને શરૂ થયા બાદ પણ ભારે તકલીફ પડવાની તેવું આ ક્ષેત્રના વિશેષજ્ઞોનું માનવું છે.મનપા કમિશનરની ગાઈડલાઈન પ્રમાણે સુરત શહેરના રીંગ રોડ અને સારોલીની કુલ 164 માર્કેટો શરૂ થઈ છે.શહેરની વિવિધ માર્કેટોમાં આવેલી દુકાનો સાથે સંકળાયેલા 70 હજારથી થી વધુ વેપારીઓ સોમવારે પોતાના વ્યવસાયમાં જોતરાયા હતા.છે.શહેરનો મુખ્ય વ્યવસાય ગણાતા હીરાઉદ્યોગમાં પણ સોમવારે થોડો ધમધમાટ જોવા મળ્યો હતો.શહેરના મહિધરપુરા,કતારગામ નંદુદોશીની વાડી અને વરાછા મીની બજારમાં આવેલી 15,000થી વધુ હીરાની ઓફિસો અને 6500થી વધુ કારખાના,350 મોટા એકમો સોમવરથી શરૂ થયા હોવાની જાણકારી મળી છે.
શહેરના ઉધના દરવાજાથી સચિન સુધી એક માત્ર રૂટ પર બીઆરટીએસની બસ પણ 50 ટકાની બેઠક ક્ષમતા સાથે આજે શરૂ કરવામાં આવશે.જયારે રિક્ષામાં ડ્રાયવર સિવાય અન્ય 2 પેસેન્જરો સાથે રિક્ષાઓ ફરતી જોવા મળી હતી. શહેરના રેલવે સ્ટેશન પર પણ સળવળાટ જોવા મળ્યો હતો.કારણેક, દેશભરમાં આજથી 200 સ્પેશિયલ ટ્રેન દોડાવવાનો કેન્દ્ર સરકારે નિર્ણય કર્યો છે.જેનું બુકીંગ શરૂ થઇ ચૂક્યું છે.આમ, ટેક્સ્ટાઇલ અને ડાયમંડ સીટી તરીકે સમગ્ર વિશ્વમાં પ્રસિદ્ધ સુરત શહેરમાં સોમવારે જનજીવન પૂર્વવત થવા માંડ્યું છે. કોરોનાની મહામારી વચ્ચે હવે સૌએ તેની સામે સુરક્ષાના પગલાં ભરી જીવન જીવવું પડશે તેવું લોકમુખે ચર્ચાઈ રહ્યું હતું આમ, લાંબા સમયના લોકડાઉંન બાદ હવે લોકોની ગાડી ફરે પાટે ચડે અને જીવન ધબકતું થઇ જાય તેવું સૌ કોઈ ઈચ્છી રહ્યા છે.
