ગુજરાત વિધાનસભા ચૂંટણીમાં સુરતમાં લિંબાયત બેઠકમાં ત્રિપાંખિયો જંગ હોવાનું કહેવાય છે.પણ આ બેઠક પર કુલ ૪૪ ઉમેદવારો હોવાથી અહીનો ચૂંટણી જંગ અપક્ષો વચ્ચે થાય તેવી સ્થિતિ છે અને તેમાં ભાજપ આસાનીથી વિજય હાંસલ કરી લે તેમ છે. ૩૪ અપક્ષ ઉમેદવારોમાં ૩૩ મુસ્લિમ સમાજના ઉમેદવારો છે જે ભાજપ પ્રેરીત હોવાનું મનાય છે.
સુરત શહેરની ૧૬ વિધાનસભા બેઠકનું આખરી ચિત્ર સ્પષ્ટ થયુ છે.કુલ ૧૬૮ ઉમેદવારો જંગમાં છે.દરમિયાન આજે લિંબાયત બેઠકમાં એકમાત્ર આમ આદમી પાર્ટીના ડમી ઉમેદવાર સંતોષ તાયવડે ફોર્મ પરત ખેંચ્યું હતું.હવે ભાજપ,કોંગ્રેસ,આપ,અન્ય ૭ પક્ષ અને બીજા ૩૪ અપક્ષ ઉમેદવારો ચૂંટણી જંગ માટે ફાઇનલ થયા છે.તેમાં લિંબાયતમાં ૪૪ ઉમેદવારોનો આંકડો સૌથી કોઇના મનમાં પ્રશ્ન ઉભો કરી રહ્યા છે કે, આટલા બધા અપક્ષ ઉમેદવારો કેમ ? અપક્ષ ઉમેદવારો થોડા ગણા મત લઇને ઉમેદવારોનું ગણિત બગાડી શકે છે.
ખાસ કરીને લિંબાયતમાં અપક્ષ ૩૪ પૈકી ૩૩ મુસ્લિમ સમાજન ઉમેદવારો છે.જે ભાજપ પ્રેરીત હોવાની ચર્ચા છે.કોંગ્રેસ અને આપના મતોનું વિભાજન કરવા કે હારના ડરથી આ આયોજન કરાયું હોવાનું ચર્ચાય છે.લિંબાયતમા ંસિટીંગ ધારાસભ્ય સંગીતા પાટીલને ૨૦૧૭ની ચૂંટણીમાં ૯૩,૫૮૫ મત મળ્યા હતા.તે સામે કોંગ્રેસના ડો.રવિન્દ્ર પાટીલને ૬૧,૬૩૪ મત મળ્યા હતા.સંગીતા પાટીલનો ૩૧,૯૫૧ મતની લીડથી વિજય થયો હતો. ૨૦૧૭માં આ બેઠક પર માંત્ર પાંચ અપક્ષ ઉમેદવારો અને ભાજપ કોંગ્રેસ સિવાય અન્ય પક્ષના ૭ ઉમેદવારો હતા.
