સુરતમાં દિવસે ને દિવસે લોકલ ટ્રાન્સમિશનનાં કિસ્સાઓમાં વધારો થઈ રહ્યો છે. આજે સુરતમાં ત્રણ વ્યક્તિઓનો રિપોર્ટ કોરોના પોઝિટિવ આવ્યો છે. સવારે બે પોઝિટિવ રિપોર્ટ બાદ સાંજે પોઝિટિવ વ્યક્તિનાં સાસુને પણ કોરોનાનો ચેપ લાગ્યો હતો. આમ સુરતમાં અત્યાર સુધી કોરોના પોઝિટિવનો કુલ આંકડો 19 થઈ ચૂક્યો છે. જ્યારે બે લોકોનાં મોત અને પાંચ લોકો રિકવર થયા છે.
સુરતમાં રાંદેર વિસ્તારમાં રહેતી 81 વર્ષીય મહિલા મહિલા દયાકૌર હીરાલાલ છાપડિયાનો કેસ પોઝિટિવ આવ્યો હતો. પોઝિટિવ દર્દીના સંપર્કમાં આવતા તેઓને કોરોનાનો ચેપ લાગ્યો હતો. રિપોર્ટ પોઝિટિવ આવતાં તેઓને આઇસોલેશન વોર્ડમાં દાખલ કરવામાં આવ્યા છે. દયાકૌર અગાઉ પોઝિટિવ જાહેર થયેલ દર્દીનાં સાસુ છે. તો તેમના પતિને હીરાલાલને પણ કોરોના પોઝિટિવ આવ્યો છે. રાંદેરમાં જ બાગ એ રહેમત અલવી રો હાઉસમાં રહેતી 45 વર્ષીય યાશ્મીન અબ્દુલ વહાબ કાપડિયાનો રિપોર્ટ પણ પોઝિટિવ આવ્યો છે.
સુરતમાં આજે ત્રણ વ્યક્તિઓનો પોઝિટિવ રિપોર્ટ આવતાં કુલ અત્યાર સુધી 19 પોઝિટિવ કેસ નોંધાયા છે. સતત લોકલ ટ્રાન્સમિશનનાં કેસોમાં વધારો થતાં સુરતમાં તમામ ખાનગી વાહનો પર પ્રતિબંધ લગાવી દેવામાં આવ્યો છે. તો સુરતમાં માસ ક્વોરન્ટાઈન પણ કરવામાં આવી રહ્યું છે. તેમ છતાં સુરતમાં દિવસે ને દિવસે સ્થાનિક સ્તરે કોરોનાનો ચેપ ફેલાતો જાય છે જે એક ચિંતાની વાત છે.
