સુરત : સુરતના પાંડેસરા ખાતે વડાપાંઉની લાલચ આપી માત્ર 10 વર્ષીય માસુમ બાળકીના અપહરણ-બળાત્કાર અને હત્યા પ્રકરણમાં સેશન્સ કોર્ટે નરાધમ આરોપી દિનેશ બૈસાણેને ફાંસીની સજાનો હુકમ કર્યો છે.ગત વર્ષે ડિસેમ્બર મહિનામાં કાકાના ઘર પાસે રમી રહેલી માસુમ બાળકી પર પાશવી બળાત્કાર ગુજારનાર નરાધમે બાદમાં ઈંટના ઘા મારીને બાળકીને મોતને ઘાટ ઉતારી દીધો હતો.સમગ્ર પ્રકરણમાં પાંડેસરા પોલીસે માત્ર 15 દિવસમાં આરોપી વિરૂદ્ધ ચાર્જશીટ રજૂ કરી હતી અને ત્યારબાદ સ્પીડી ટ્રાયલ અંતર્ગત આજરોજ નામદાર કોર્ટ દ્વારા ચુકાદો સંભળાવવામાં આવ્યો હતો.
ગત 7મી ડિસેમ્બર 2020ના રોજ પાંડેસરા ખાતે પોતાના કાકાના ઘર બહાર રમતી માત્ર 10 વર્ષીય માસુમ બાળકીને ત્યાંથી પસાર થઈ રહેલા દિનેશ બૈસાણે નામના આરોપીએ વડાપાંવ ખવડાવવાની લાલચ આપીને ઉધના ખાતે બીઆરસી કમ્પાઉન્ડ પાસે આવેલ ઝાડીમાં લઈ ગયો હતો.જ્યાં નરાધમ દ્વારા માસુમ બાળકી પર જઘન્ય બળાત્કાર આચરવામાં આવ્યો હતો.આ દરમ્યાન બાળકીએ પ્રતિકાર કરતાં આરોપીના હાથ પર બચકું ભરી લીધું હતું.જેને પગલે ઉશ્કેરાયેલા દિનેશ બૈસાણેએ બળાત્કાર બાદ પાસે પડેલી ઈંટના ઉપરાછાપરી સાત ઘા ઝીંકીને માસુમ બાળકીની ઘાતકી હત્યા કરી દીધી હતી.
પાંડેસરા પોલીસ દ્વારા સમગ્ર પ્રકરણની ગંભીરતાને ધ્યાને રાખીને સીસીટીવી સહિતના પુરાવાઓ એકત્રિત કરીને માત્ર 15 દિવસમાં એટલે કે 21મી ડિસેમ્બરના રોજ 250 પાનાની ચાર્જશીટ કોર્ટ સમક્ષ રજુ કરી હતી.જેમાં સીસીટીવી ફુટેજની સાથે સાથે માસુમ બાળકીનો ડીએનએ રિપોર્ટ,એફએસએલ રિપોર્ટ,તબીબી સાક્ષીઓ સહિતના જડબેસલાક પુરાવાઓનો સમાવેશ થયો હતો.ચાર્જશીટ દાખલ થયા બાદ સ્પીડી ટ્રાયલ દરમ્યાન કોર્ટમાં 45 જેટલા પંચ સાક્ષી,પંચનામાના સાક્ષીઓએ પણ આરોપીને ફાંસીની સજા સંભળાવવામાં મહત્વપૂર્ણ ભુમિકા નિભાવી હતી.એડીશનલ સેશન્સ જજ એ.એન.અંજારીયાએ ગુરૂવારે આરોપી દિનેશ બૈસાણે વિરૂદ્ધ દુષ્કર્મ-હત્યા અને પોસ્કો જેવા ગંભીર આરોપો હેઠળ ફાંસીની સજા સંભળાવી હતી.
ઉલ્લેખનીય છે કે,10 દિવસ પૂર્વે જ સુરત કોર્ટ દ્વારા પાંડેસરા ખાતે માત્ર અઢી વર્ષની માસુમ બાળકી પર બળાત્કાર અને હત્યાના ગંભીર આરોપમાં ગુડ્ડુ યાદવ નામના નરાધમને પણ ફાંસીની સજા સંભળાવી હતી.ત્યારે આ પ્રકરણમાં પણ સરકાર પક્ષ દ્વારા રેરેસ્ટ ઓફ રેર કેસ ગણીને આરોપી દિનેશ બૈસાણેને ફાંસીના માચડે ચઢાવવાની રજુઆત કરી હતી.
દુષ્કર્મ – હત્યાના જઘન્ય કૃત્યનો આ જ અંજામઃ નયન સુખડવાલા : સરકારી વકીલ નયન સુખડવાલએ જણાવ્યુ હતુ કે આખા કેસમાં જે રીતે આરોપી બાળકીને લઈને જઈ રહ્યો હતો,તે સીસીટીવીથી લઈને ઘટના સ્થળ પર દુષ્કર્મ-હત્યાનું જઘન્ય કૃત્ય થયું તો ત્યાંથી જેટલા પણ પુરાવાઓ મળ્યા હતા.જે એક પછી એક આરોપીને ફાંસીને માચડે સુધી લઈ જવા માટે મહત્વપૂર્ણ સાબિત થયા હતા.તમામ પ્રકારના એવિડન્સ અમે કોર્ટમાં પ્રુફ કર્યા.એની અંદર પોસ્ટમોર્ટમ રિપોર્ટ મહત્વનો હતો.પોસમોર્ટમ અને ડીએનએના આધારે અમે નક્કી કર્યુ કે,બાળકી ઉપર દુષ્કર્મ પણ કરવામાં આવ્યુ છે.આ ખૂબ જ ગંભીર પ્રકારની હત્યા કહી શકાય છે,કારણકે દુષ્કર્મ કર્યા બાદ જે રીતે બાળકીની હત્યા કરવામાં આવી તે ખૂબ જ ગંભીર પ્રકારની હતી.બાળકીના માથા અને આખોમાં ગંભીર ઈજાઓ હતી.દિનેશે તેની માતાને દવાખાને લઇ જવાની હતી.જો કે તેણીને તકલીફમાં છોડી દિનેશે બાળકી સાથે આ હેવાનિયત ભરેલું કૃત્ય કર્યું હતું.
