– મનોહર નામનો માફિયો સ્થાનિક આગેવાનો સાથે બિનઅધિકૃત રીતે ઔદ્યોગિક એકમોમાં પાણી સપ્લાય કરી રહ્યો છે
બારડોલી : સુરત જિલ્લાના પલસાણા તાલુકાનાં તાતીથૈયા ગામે આવેલ ડાઇંગ પ્રિંટિંગ મીલોમાં પાણીની અછત ઊભી થતી હોય જેને પહોંચી વળવા માટે આ મીલ માલિકો હવે અન્ય જગ્યાએ થી પાણીની વ્યવસ્થા ઊભી કરી રહ્યા છે.જેને લઈ તાતીથૈયામાં ધીમે ધીમે પાણી માફિયાઓ સક્રિય થયા છે.ખાનગી માલિકીની જગ્યાઓમા બોરવેલ કરી મીલ સુધી પાણી પહોંચાડવા માટે બિનઅધિકૃત પાઇપલાઇનની જાળ બિછાવી રહ્યા છે.કરોડોના આ બિનઅધિકૃત કારભારમાં મુખ્ય સૂત્રધાર મનોહર સાથે અનેક સ્થાનિક આગેવાનોની પણ સંડોવણી બહાર આવે તેમ છે.
સુરત જિલ્લાના પલસાણા તાલુકાનાં તાતીથૈયા ગામે આવેલ ડાઇંગ પ્રિંટિંગ યુનિટોમાં બિનઅધિકૃત રીતે પાણીનો જથ્થો પૂરો પાડવા માટે પાણી માફિયાઓ સક્રીય બન્યા છે.ઔદ્યોગિક એકમોમાં પાણીની અછતના પગલે આ માફિયાઓ આડેધડ ખાનગી માલીકીની જમીનમાં બોરવેલ કરી અંદર ગ્રાઉંડ રાતોરાત પાઇપલાઇન કરી આ વેપાર કરી રહ્યા છે.જેમાં સ્થાનિક સિંચાઇ વિભાગના અધિકારીની ભૂમિકા પણ શંકાસ્પદ રહેલી છે.થોડા સમય અગાઉ એક ખાનગી એન.જી.ઓએ આ હકીકત અંગે મામલતદાર અને સિંચાઇ વિભાગને ફરિયાદ કરી હોવા છતાં સમગ્ર પ્રકરણમાં વહીવટી તંત્ર આંખ આડા કાન કરી રહયું છે.સૂત્રોના જણાવ્યા અનુસાર હાલમાં અંદાજિત 20 થી વધુ જગ્યાએ આ પ્રકારના બોરવેલ કરી તેમાંથી બિનઅધિકૃત રીતે પાણીનો સપ્લાય કરવામાં આવી રહ્યો છે.વિસ્તારમાં મનોહર નામના પાણી માફિયો કેટલાક સ્થાનિક આગેવાનો સાથે ભેગા મળીને આ સમગ્ર નેટવર્ક ચલાવી રહ્યો છે.જેને લઈ ભૂગર્ભમાં પાણીના જળસ્તર નીચા ઉતરી રહ્યા છે. 20 જેટલી જગ્યાઓ ઉપર રાતદિવસ બિન અધિકૃત રીતે પાણી ઉલેચી વિવિધ જગ્યાએ સપ્લાય કરવામાં આવે છે.ઔદ્યોગિક એકમોના માલિકો તેમજ પાણી માફિયાઓની સાંઠગાંઠમાં સ્થાનિક આગેવાનોની સંડોવણી પણ ઘણું ખરું કહી જાય છે. અનેક જગ્યાએ બિનઅધિકૃત રીતે નહેરની નીચેથી પાઇપ લાઇન પસાર કરી દેવામાં આવી છે છતાં સિંચાઇ વિભાગના અધિકારીઓ પણ આ બાબતે મૌન સેવી રહ્યા છે ત્યારે આવનારા દિવસોમાં આ વિસ્તારમાં મોટું જળ સંકટ ઊભું થાય તો નવાઈ નહીં. ત્યારે આ બાબતે વહીવટી તંત્ર સક્રીય બને એ જરૂરી છે.
