-ઓનલાઇન સર્ચમાં રીલાયન્સ કંપનીના વ્યાજ દર ઓછો જોઇ ફોર્મ ભર્યુ, ભેજાબાજે વ્હોટ્સઅપ પર લોન સેન્શન લેટર મોકલાવી અલગ-અલગ ચાર્જીસના નામે રોકડ પડાવી
સુરત,તા.12 મે : સુરતની જાણીતી સુરત પીપલ્સ બેંકના ઓફિસરે રીલાયન્સ ફાઇનાન્સ કંપનીમાંથી 5 ટકાના દરે પર્સનલ લોનની લાલચમાં રૂ. 4.30 લાખ ગુમાવતા અડાજણ પોલીસમાં છેતરપિંડીની ફરીયાદ નોંધાય છે.
નાનપુરા-ટીમલીયાવાડની વસુંધરા ભવન બિલ્ડીંગમાં આવેલી સુરત પીપલ્સ બેંકના ઓફિસર અનીશ અનિલ નાંણાવટી (ઉ.વ. 50 રહે. 39, જલારામ સોસાયટી, અડાજણ) ગુગલ પર રીયાલન્સ ફાઇનાન્સ લિ. દ્વારા 5 ટકાના દરે પર્સનલ લોનની જાહેરાત જોઇ ફોર્મ ભર્યુ હતું. ફોર્મ ભર્યાના બીજા દિવસે રીલાયન્સ કંપનીની મુંબઇ-બાંદ્રા હેડ ઓફિસમાંથી મેનેજર ધર્મેન્દ્રસીંગના નામે મોબાઇલ નં. 7595071735 પરથી કોલ આવ્યો હતો. ધર્મેન્દ્રએ લોન મંજૂરીનો લેટર વ્હોટ્સઅપ પર મોકલાવી લોન પ્રોસેસ લોન એગ્રીમેન્ટ,ઇન્સ્યોરન્સ,જીએસટી,સીએસટી તથા રીફંડ ચાર્જીસ પેટે કુલ રૂ. 3.75 લાખ ભરાવ્યા હતા. પરંતુ બીજા રૂપિયા ટ્રાન્સફર કરવાનું કહેતા અનીશને શંકા ગઇ હતી અને રૂ. 3.75 લાખ રીફંડ કરવાનું કહ્યું હતું.પરંતુ ધર્મેન્દ્રએ રીફંડ માટે રૂ. 51,800 ભરવાનું કહેતા અનીશે ઇન્કાર કરી દીધો હતો.જેથી અનીશે પુનઃ ફાઇનાન્સ કંપનીના નંબર 7798736259 પર કોલ કર્યો હતો. આ નંબર પર વાત કરનારે લોન સેન્શન કરાવી આપવાની લાલચ આપી વધુ રૂ. 50 હજાર ટ્રાન્સફર કરાવ્યા હતા અને ત્યાર બાદ ફાઇલ ચાર્જ પેટે વધુ રૂ. 40 હજાર ભરવાનું કહેતા અનીશને શંકા ગઇ હતી.જેને પગલે છેવટે અડાજણ પોલીસમાં છેતરપિંડી અને આઇટી એક્ટ હેઠળ ફરીયાદ નોંધાવી હતી.
