– ભાજપના 120, કોંગ્રેસના 117 અને આમ આદમીના 114 ઉમેદવારો વચ્ચે સીધો જંગ
સુરત : એશિયાના સૌથી વધુ ઝડપથી વિકસતા સુરત શહેરની મહાનગરપાલિકાના કાઉન્સિલર બનાવા માટેની ચૂંટણીનું મતદાન થઈ રહ્યું છે.સવારથી જ રાજકીય પાર્ટીઓના આગેવાનોએ મતદાન કરવાની શરૂઆત કરી દીધી છે.છેલ્લા ઘણા દિવસથી પ્રચાર અભિયાન કર્યા બાદ હવે રાજકીય પાર્ટી માટે મતદારોને મતદાન મથક સુધી લઈ જવા માટેનો પ્રયાસ કરી રહ્યા છે.દરમિયાન સરથાણા ખાતે મતદાન સેન્ટર પર હેન્ડ ગ્લવ્ઝ ન આપતા લોકો અકળાયા હતા.
ભાજપ-કોંગ્રેસના નેતાઓ મતદાન કરવા પહોંચ્યા
ભાજપના નેતાઓ દ્વારા અને કોંગ્રેસના કેટલાક નેતાઓ સવારથી જ મતદાન કરવાનું શરૂ કરી દીધું હતું.રાજકીય પાર્ટીઓ માટે સૌથી મોટો પડકાર મતદારોને મતદાન મથક સુધી લઈ જવાનો છે.છેલ્લા રાજકીય પાર્ટીઓના તમામ નેતાઓ દ્વારા સતત લોકોને ગઇકાલથી જ અપીલ કરવામાં આવી રહી હતી કે મોટી સંખ્યામાં મતદાન મથકો પર જઈને મતદાન કરે.શહેરના જાણીતા વ્યક્તિઓ દ્વારા પણ આ જ પ્રકારે સોશિયલ મીડિયાના માધ્યમથી અપીલ કરવામાં આવી હતી.
કોરોના ગાઈડલાઈન સાથે મતદાન
તમામ બુથો ઉપર વહીવટી તંત્ર દ્વારા યોગ્ય વ્યવસ્થા કરવામાં આવી છે.કોરોના ગાઈડલાઈન સાથે મતદાન શરૂ કરવામાં આવ્યું છે.મતદાન પ્રક્રિયા દરમિયાન કોઈપણ પ્રકારની મુશ્કેલીઓના પડે પોલીસ તંત્ર દ્વારા પણ તમામ મતદાન ભૂતની ઉપર ચુસ્ત પોલીસ બંદોબસ્ત ગોઠવી દીધો છે.
ચૂંટણી જંગમાં કુલ 484 ઉમેદવારો
ચૂંટણી જંગમાં કુલ 484 ઉમેદવારો પોતાનું નસીબ અજમાવી રહ્યાં છે. મહાનગર પાલિકાના 30 વોર્ડ માટેની 120 બેઠક પર ભાજપના 120, કોંગ્રેસના 117 અને આમ આદમી પાટીના 114 ઉમેદવારે મેદાનમાં ઉતર્યા છે. જેની સામે અપક્ષ 55 અને અન્ય પાર્ટી 78ના ઉમેદવારો પણ નસીબ અજમાવી રહ્યાં છે. અંદાજે 32.88 લાખથી વધુ મતદારો પોતાનો મતાધિકારનો ઉપયોગ કરીને કાઉન્સિલર માટે મતદાન કરી રહ્યા છે.
વોર્ડ નંબર-2માં સૌથી વધુ મતદાન મથકો
પાલિકાની ચૂંટણીમાં 18,17,238 પુરૂષ અને 14,70,999 સ્ત્રી મતદારો મળી કુલ 32,88,352 મતદારો પોતાના મતાધિકારનો ઉપયોગ સવારે સાતથી સાંજના 6 વાગ્યા સુધીમાં કરશે. વોર્ડનં. 02માં કુલ 165 મતદાન મથકોમાં સૌથી વધુ 1,73,515 મતદારો નોંધાયા છે, જેમાં મતદાન મથક દીઠ સરેરાશ 1052 મતદારો થાય છે.જ્યારે સૌથી ઓછા મતદારો ધરાવતા વોર્ડ નં.15 માં 84,646 મતદારો છે. આ વોર્ડમાં મતદાન મથક દીઠ સરેરાશ 1008 મતદારો થાય છે.
વોર્ડ નં.27માં સૌથી વધુ 28 ઉમેદવાર
મનપાની ચૂંટણીમાં વોર્ડ નં.27 ડિંડોલી (દક્ષિણ)માં સૌથી વધુ 28 ઉમેદવારો મેદાનમાં છે. જેમાં 11 ઉમેદવાર અપક્ષના છે. તો બીજી તરફ વોર્ડ નં.15 કરંજ-મગોબમાં સૌથી ઓછા 12 ઉમેદવારો ચૂંટણી લડી રહ્યા છે.
4400 ઇવીએમ મશીનો મૂકાયા
પાલિકાની ચૂંટણીમાં કુલ 4400 ઈવીએમ મશીનો વિવિધ મતદાન મથકો પર મૂકી દેવામાં આવ્યાં છે. કોઈ મશીનમાં ખરાબી નીકળે તો એક્સ્ટ્રા મશીન પણ મૂકી દેવામાં આવ્યાં છે.આ સિવાય પણ ઝોનમાં મશીન વધારાના રાખવામાં આવ્યાં છે.જેથી યોગ્ય ઉપયોગ કરી શકાય.
મતદારોને હેન્ડ ગ્લવ્ઝ આપી મતદાન
કોરોનાની મહામારીને ધ્યાને લઇને સુરત મહાનગર પાલિકાની ચૂંટણીમાં મતદારોને પણ મતદાન કરવા માટે હેન્ડ ગ્લવ્ઝ આપવામાં આવી રહ્યાં છે.સાથે જ મતદાન વખતે મતદાન કરવા માટે આવનારા મતદારોને સેનેટાઇઝ કરવા ઉપરાંત હેન્ડ ગ્લવ્ઝ આપીને મતદાન કરાવાઈ રહ્યું છે. મતદાન મથકો તથા અન્ય પ્રક્રિયામાં સંકળાયેલા સ્ટાફનો એન્ટીજન ટેસ્ટ પણ કરાવવામાં આવ્યો છે.
