ઓલપાડ : સુરત જિલ્લાના ઓલપાડ તાલુકાનાં પરિયા ગામની સીમમાં ખેતરાડી વિસ્તારમાં કેટલાક શખ્સો વિદેશી દારૂનું કાર્ટિંગ કરી રહ્યા હતા.તે સમયે સુરત રેન્જની ઓપરેશન ગૃપની ટીમે રેડ કરતાં આ શખ્સો કાર મૂકી ત્યાંથી ભાગી છૂટ્યા હતા. પોલીસે 10.89 લાખનો વિદેશી દારૂનો જથ્થો કબ્જે કર્યો હતો.
પ્રાપ્ત માહિતી અનુસાર સુરત રેન્જની ઓપરેશન ગૃપની ટીમ ઓલપાડ વિસ્તારમાં પેટ્રોલીંગમાં હતી તે દરમ્યાન બાતમીના આધારે સાંધીયર ગામની સીમમાં કોસમ ગામ તરફ જતાં રસ્તા ઉપર આવતા ખેતર નજીક રેડ કરી હતી.તે સમયે કેટલાક શખ્સો વિદેશી દારૂનું કાર્ટિંગ કરી રહ્યા હતા.પોલીસને જોઈ આ શખ્સો કાર નંબર એમએચ-04-ડીજે-1507 મૂકી ત્યાંથી ભાગી છૂટ્યા હતા.પોલીસે સ્થળ ઉપર પહોંચી કારમાંથી વિદેશી દારૂ તેમજ બિયરની કુલ 8496 નંગ બોટલ કિંમત રૂ. 10.89 લાખનો જથ્થો કબ્જે કર્યો હતો.પોલીસે વિદેશી દારૂ તેમજ કાર મળી કુલ 13.39 લાખનો મુદ્દામાલ કબ્જે કરી કાર ચાલકને વોંટેડ જાહેર કરી આગળની કાર્યવાહી હાથધરી છે.
