સુરત,
સુરત શહેર અને જિલ્લામાં લોકડાઉન 3 સ્ફોટક બની રહ્યું છે.છેલ્લા બે લોકડાઉનથી વતન જોવાની વાટમાં ધીરજ ધરીને બેઠેલા કારીગરોને વતન જવાના નામે ભૂખ અને નરી પીડા જ વેઠવાનો વખત આવતા સૌએ પોતાની હિંમત અને ધીરજ હવે ગુમાવી દીધી છે.છેલ્લા અઠવાડિયાથી પરપ્રાંતિય કારીગરોને વતન જવાની છૂટ અપાયા પછી તેઓ શારીરિક-માનસિક રીતે અને પૈસેટકે જે રીતે હેરાન થયા છે તે તમામ બાબતો હવે આક્રોશ અને તોફાન બનીને બહાર આવી રહ્યાં છે. જેના કારણે સુરત જિલ્લાના પલસાણાના વરેલી ખાતે અને શહેરના પાલનપોર જકાતનાકા વિસ્તારમાં પરપ્રાંતિયો રસ્તા પર આવી ગયા છે.સૂત્રોચ્ચાર કરી રહ્યાં છે,પથ્થરમારો શરૂ થયો છે.પોલીસે સ્થિતિ કાબુમાં લેવા અશ્રુગેસના શેલ પણ છોડ્યા છે,પરંતુ ક્યાં સુધી સ્થિતિ પર કાબૂ રાખશે અને રસ્તા પર ઊતરી આવેલા આક્રોશિત ટોળાઓથી ક્યાં કેટલું કોરાના સંક્રમણ ફેલાયું હશે? આ સ્થિતિ સુરત માટે ટાઈમબોમ્બ જેવી બની ચૂકી છે.
લોકડાઉન 2ની મુદ્ત પૂર્ણ થવાની હતી તે દિવસોમાં જ સરકારે પરપ્રાંતિય કારીગરોને પોતપોતાની વતન જવાની શરતી છૂટ પ્રાપ્ત બનશે તેવી જાહેરાત કરતાં સુરતમાં વસતા લાખો પરપ્રાંતિય કારીગરવર્ગમાં હિંમત આવી હતી.અંદાજે 14 લાખ જેટલા યુપી,એમપી,ઓરિસ્સા,રાજસ્થાન,મહારાષ્ટ્ર તથા અન્ય રાજ્યોના કારીગરો સુરતમાં વસવાટ કરે છે.છેલ્લાં 40 દિવસથી તેઓ વતન જવાની રાહ જોઈને બેઠા હતા.રાશનપાણી ખૂટી ગયા હતા અને સરકારી દાલ-ચાવલ પર આધારિત બની ગયા હતા.કોરોનાની આ મહામારીમાં એકવાર પોતાના વતન અને પરિવાર પાસે પહોંચી જવા અધિરા બનેલા આ વર્ગને જ્યારે શરતી છૂટછાટ મળી ત્યારે ભાડાના ઘર ખાલી કરી,ઘરમાં જે કંઈ બચેલું રાશનપાણી હતું તે બધું જ આસપાસના લોકોને સુપરત કરી ક્યાંકથી ઉધારી કરી, કોઈએ મદદ મેળવી અને કોઈએ પોતાની તમામ બચત દાવ પર લગાડીને લકઝરી બસોમાં એક-એક સીટ મેળવવા હજારો રૂપિયા ખર્ચયા. આમાં સૌથી વિકટ સ્થિતિ યુપી અને મહારાષ્ટ્રના કારીગરોની થઈ.સુરતથી યુપી પહોંચેલી બસો છેક ઉત્તરપ્રદેશની બોર્ડર પર જઈને પરત મોકલી અપાઈ. વતન સુધી પહોંચેલા કારીગરો ગુજરાત પરત આવવા તૈયાર ન હતા તેઓને સત્તાના જોરે બસમાં પરત સુરત મોકલાયા અને તે સ્થિતિ આ કારીગરો માટે મરવાથી પણ વધુ બદતર હતી.આ પરિસ્થિતિનો નીવેડો નહોતો આવ્યો ત્યાં વતન જવા માંગતા કારીગરો માટે ઓનલાઈન રજિસ્ટ્રેશનની વાત આવી. ખાવાના અને રહેવાના ફાંફા હોય તે અભણ કારીગર મોબાઈલમાં જઈને ઓનલાઈન રજિસ્ટ્રેશન ફોર્મ ભરી શકે? આ અને આવી અનેક શારીરિક અને માનસિક યાતાનાઓમાંથી પસાર થઈ રહેલા સુરતના કારીગર વર્ગની તકલીફ વધી છે. સરકારો વચ્ચે સંકલનના સ્પષ્ટ અભાવે સુરત પ્રજા માથે કોરોના સંક્રમણનું ભયાનક જોખમ ઊભું કરી દીધું છે.
