3 મે, 2022 મંગળવાર : બેંગ્લોર : ભારતમાં ઇલેક્ટ્રિક સ્કૂટરો માટે જે ઉત્સાહ જન્મ્યો હતો તે હવે ઓસરી રહ્યો હોવાના સંકેત મળી રહ્યાં છે.નીચી કાર્યક્ષમતા અને હવે આગ લાગવાના અનેક બનાવો ભારતનો ઈવી પ્રત્યેનો ક્રેઝ ઘટાડી રહ્યાં છે.જોકે વધુ એક અન્ય સમસ્યા પણ છે જે દેશના ઈલેક્ટ્રિક વાહન બજારને નરમ પાડી રહ્યો છે અને તે છે ચિપની અછત.માર્ગ પરિવહન અને ધોરીમાર્ગ મંત્રાલયની વેબસાઈટ વાહનના ડેટા અનુસાર એપ્રિલમાં આઠ ઈલેક્ટ્રિક ટુ-વ્હીલર કંપનીઓના રજિસ્ટ્રેશનનો આંકડો લગભગ 1 ટકા ઘટીને 43,061 યુનિટ રહ્યો છે.દેશમાં પેટ્રોલ-ડીઝલ કારના બજારને જ આ સમસ્યા નડી રહી હતી પરંતુ હવે યુક્રેન-રશિયા યુદ્ધ પછી ખાસ કરીને ચિપની સતત અછત ઘેરી બની છે.
તાજેતરના ઝડપી વૃદ્ધિના આંકડા બાદ હવે આ ઘટાડો સમાન્ય કહી શકાય કારણકે ઈ-સ્કૂટરનું રજિસ્ટ્રેશન ફેબ્રુઆરી કરતાં માર્ચમાં 58 ટકા અને જાન્યુઆરી કરતાં ફેબ્રુઆરીમાં 15 ટકા વધ્યું હતુ.રજિસ્ટ્રેશનમાં સૌથી મોટો ઘટાડો હીરો ઈલેક્ટ્રીકની ગાડીઓમાં જોવા મળ્યો હતો.માર્કેટની સૌથી મોટી કંપનીઓમાંની એક હીરોના સ્કૂટર્સનું રજિસ્ટ્રેશન માર્ચમાં 13,029ની સરખામણીએ એપ્રિલમાં લગભગ અડધું ઘટીને 6570 યુનિટ જ થયું હતું.બેંગલુરુ સ્થિત એથર એનર્જીની એપ્રિલમાં નોંધણી 3000 યુનિટથી વધુ વધી નથી.આ સિવાય અન્ય નાની કંપનીઓએ ભારે ઘટાડો નોંધાવ્યો હતો.માર્ચની સરખામણીમાં પ્યોર એનર્જીએ એપ્રિલમાં નોંધણીમાં 15 ટકા, રિવોલ્ટમાં 12 ટકા અને બેનલિંગ ઇન્ડિયાએ 19 ટકાનો ઘટાડો નોંધાવ્યો હતો.વિશ્લેષકોના મતે આ આંકડા કોન્સોલિડેશનની શરૂઆત હોઈ શકે છે.કુલ વેચાણના આંકડાઓ અને નોંધણીના આંકડાની સરખામણી સીધી નથી કારણકે ગાડીઓના વેચાણ અને નોંધણીમાં થોડાક દિવસોનું અંતર હોઈ શકે છે.
ઓલા ઈલેક્ટ્રીકના આંકડાઓએ એકંદર કુલ રજિસ્ટ્રેશનના આંકડાને મજબૂત રાખવામાં મદદ કરી હતી.ઓલા ઈલેક્ટ્રિક સ્કૂટર્સનું વેચાણ માર્ચની સરખામણીએ એપ્રિલમાં 39 ટકા વધીને 12,683 થયું હતું.એપ્રિલમાં ઓકિનાવાનું રજિસ્ટ્રેશન 11,011 યુનિટ હતુ જે માસિક દ્રષ્ટિએ 32 ટકા વધારે છે.એથર એનર્જીના સહ-સ્થાપક તરુણ મહેતાએ જણાવ્યું હતું કે નોંધણીનો ઘટાડો મુખ્યત્વે ચિપની અછતને કારણે થયો હતો.અમે દર મહિને 10,000 વાહનોનું ઉત્પાદન કરવા માંગીએ છીએ પરંતુ ચિપની ઉપલબ્ધતા ન હોવાને કારણે તેમાંથી 30 ટકા લક્ષ્યાંક પણ હાંસલ નથી કરી શકતા.જોકે ફેબ્રુઆરીની સરખામણીમાં સ્થિતિમાં 30-35 ટકાનો સુધારો થયો છે પરંતુ અગાઉ અમારા મતે ઓગસ્ટ સુધી આ અછત ચાલુ રહેવાનો અંદાજ હતો પરંતુ વર્તમાન પરિપ્રેક્ષમાં ચિપની અછત 2023 સુધી ચાલુ રહેવાની આશંકા છે.હીરો ઈલેક્ટ્રીકને પણ આ વાતનો સ્વીકાર કર્યો હતો.કંપનીના મેનેજિંગ ડિરેક્ટર નવીન મુંજાલનું માનવું છે કે ચીપની અછત છે, સ્થિતિ તંગ છે પરંતુ કંપની આ વર્ષ માટે વેચાણના લક્ષ્યાંકને પૂર્ણ કરી શકે છે.
