– પોલીસની ખાસ ટીમે ટેકનીકલ સર્વેલન્સના આધારે આરોપીને ઝડપી લીધો
– આરોપીએ હિન્દુ સમાજની લાગણી દુભાય તેવા શબ્દો ઉચ્ચારી વિડીયો વાયરલ કર્યો હતો
જગવિખ્યાત સોમનાથ મંદિરના ઇતિહાસ વિષે અપમાનજનક અને મંદિર પર મહમદ ગઝનવીએ કરેલી લૂંટના પરાક્રમને વખાણતા ઉચ્ચારણો કરનારા વિધર્મી યુવકના વાયરલ વિડીયો મામલે ગીર સોમનાથ પોલીસની સ્પેશ્યિલ ટીમએ આજે વહેલી સવારે હરીયાણાના પાણીપતથી ઇર્શાદ રસીદ નામના યુવકને ઝડપી લઇ પરત આવવા રવાના થઇ છે.સોમનાથ મંદિરના ઇતિહાસ વિષે ભડકાઉ ઉચ્ચારણવાળો એક વિડીયો વાયરલ થયો હતો.આ વિડીયો સોમનાથ મંદિરની પાછળના ભાગે દરિયા કિનારા પર એક વિધર્મી યુવકે પોતાના મોબાઈલમાં સેલ્ફી મોડમાં વિડીયો રેકોર્ડ કર્યો હતો. વાયરલ વિડીયોમાં તે બોલી રહ્યો છે કે, સોમનાથ મંદિરને મહમદ ગઝનવીએ લૂંટયું હતું જે શબ્દ બોલી ગઝનવીના વખાણ કરી રહ્યો છે.આ વીડિયો વાઇરલ થતા હિન્દુ સમાજમાં વિધર્મી યુવક સામે રોષ ભભુકયો ઉઠ્યો છે.
આ સમગ્ર મામલે સોમનાથ મંદિર ટ્રસ્ટના જનરલ મેનેજર વિજયસિંહ ચાવડા દ્વારા લેખીત ફરીયાદ અપાઇ હતી જેના આધારે પ્રભાસપાટણ પોલીસે ઉશ્કેરણી કરતો વિડીયો બનાવી અને હિન્દુ સમાજની લાગણી દુભાય તેવા શબ્દો ઉચ્ચારી બે ધર્મ વચ્ચે હુલ્લડ ફાટી નિકળે તેવા કામ કરતા વિધર્મી યુવક ઇર્ષાદ રસીદની યુ-ટ્યુબ પર ‘જમાતે આદીલા હિંદ’ નામની ચેનલનું એકાઉન્ટ ધરાવતો હોવાની ફરીયાદમાં ઉલ્લેખ કરી તેની સામે આઇપીસી કલમ 153 (એ), 295 (એ) મુજબ ગુનો નોંધ્યો હતો.
આ મામલે વિધર્મી યુવક ઇર્ષાદને ઝડપી લેવા ગીર સોમનાથ પોલીસની સ્પેશ્યિલ સહિતની જુદી જુદી ટીમોએ તપાસ હાથ ધરી હતી. દરમિયાન આરોપી ઇર્ષાદનું લોકેશન હરીયાણાના પાણીપતમાં મળ્યુ હતુ.જેથી જીલ્લા પોલીસની એક ખાસ ટીમ પાણીપત પહોંચી હતી, જ્યાથી આજે વહેલી સવારે પાંચેક વાગ્યે આરોપી ઇર્ષાદ રસીદને ઝડપી લેવામાં આવ્યો છે અને પોલીસ ટીમ પરત આવવા રવાના થઇ હોવાનું જાણવા મળ્યું છે.વિધર્મી યુવક સુધી પહોંચવામાં ટેકનીકલ સર્વેલન્સની માહિતી મહત્વપૂર્ણ સાબીત થઇ છે.સોમનાથ મંદિરની પાછળ અડઘો કીમી દુર વિડીયો બનાવનાર આરોપી ઇર્ષાદ રસીદ ‘જમાતે આદીલા હિંદ’ નામની યુ-ટયુબ ચેનલનું એકાઉન્ટ ધરાવતો હોવાનું તપાસમાં જણાઇ આવ્યું હતુ.જેથી પોલીસની ટેકનીકલ સર્વેલન્સની ટીમએ આરોપીની યુ-ટયુબ ચેનલમાં અપલોડ કરાયેલા વિડીયોના ઇન્ટેરનેટનું આઇ.પી. એડ્રેસ ટ્રેસ કર્યુ હતુ.જેના થકી યુ-ટયુબ ચેનલમાં રહેલા વિડીયો કયાં મોબાઇલ નંબરના ઇન્ટરનેટ ડેટા દ્રારા અપલોડ થયો હતો તેની માહિતી મેળવી હતી.જેની તપાસમાં ઇર્ષાદ રસીદ નામના વ્યકિતની ઓળખ જાણવા મળી હતી. તેના મોબાઇલ નંબરને ટ્રેસ કરતા હરીયાણાનું પાણીપતનું લોકેશન મળતા પોલીસની ખાસ ટીમ પાણીપત ગઇ હતી,ત્યાથી આરોપીને ઝડપી પરત આવવા રવાના થઇ છે.
આરોપી ઇર્ષાદ રસીદને પકડવા ગીર સોમનાથ પોલીસની ખાસ ટીમ હરીયાણાના પાણીપત પહોંચી રહી હોવાની ભનક લાગી ગઇ હોવાથી આરોપીએ પોતાનો મોબાઇલ બંઘ કરી પોતાના કાયમી વસવાટનું સ્થળ છોડી ભાગી ગયો હતો.જોકે,ગીર સોમનાથ પોલીસે આખી રાતભર શોધખોળ હાથ ઘરી આજે વહેલી સવારે પાંચ વાગ્યે પાણીપત શહેરથી થોડે દુરથી આરોપી ઇર્ષાદ રસીદને ઝડપી લીઘો હતો.હાલ તેને લઇ પોલીસની ખાસ ટીમ પરત આવવા રવાના થઇ ગઇ હોવાનું અધીકારીક સુત્રોમાંથી જાણવા મળ્યું છે.
