અમદાવાદ : સોલાના પાર્ક વ્યુ એપાર્ટમેન્ટમાં રહેતા છ વર્ષના બાળકનું પડોશમાં જ રહેતા બેકાર યુવકે અપહરણ કરી ખંડણી પડાવવાનો પ્લાન ઘડ્યો હતો.જોકે,પાડોશી યુવક બાળકનું અપહરણ કર્યા બાદ ખંડણી માગવાની હિંમત કરી શક્યો નહોતો તેથી બાળકને શીલજ નજીક અવાવરૂ જગ્યાએ લઇ જઇ માથાના ભાગે ઇજા પહોંચાડી ફેંકી દીધો હતો.બીજી તરફ સોસાયટીના જાગૃત વડીલોએ તેમની નજર સામે રમતાં બાળકો પૈકી એક બાળક નજરે નહિ પડતાં તેની શોધખોળ કરવાની સાથે પરિવારને જાણ પણ કરી હતી.સોલા પોલીસે તરતજ સીસીટીવી ફૂટેજ ચેક કરી અડધા કલાકમાં તો બાળકનું અપહરણ કરનાર યુવકને ઝડપી લઇ બાળકને શોધી સારવાર માટે હોસ્પિટલમાં ભરતી કરાવ્યો હતો.સોલા પોલીસ ઇન્સ્પેક્ટર એન.આર.વાઘેલા અને પીએસઆઇ જે.જે રાણાએ બાળક ગુમ થયા બાદના સોસાયટીના સીસીટીવી કેમેરા ચેક કરતાં એક જ કાર સોસાયટીની બહાર ગઇ હોવાનું જણાતું હતું.બીજા કેમેરા ચેક કરતાં બાળક જે તે કારમાં નજરે પડતાં ભેદ ઉકેલાઇ ગયો હતો.અમદાવાદ શહેરમાં છેલ્લા ઘણા દિવસોથી બાળકોના અપહરણની ઘટના વધી રહી છે.આવી એક ઘટનામાં સોલાના પાર્કવ્યુ એપાર્ટમેન્ટમાં મોડી સાંજે છ વર્ષનો બાળક રમતા રમતા ગુમ થઈ ગયો હતો.જોકે,લાંબા સમય સુધી અન્ય બાળકો સાથે રમતો આ બાળક નજરે નહિ પડતા સોસાયટીના રહીશોએ આ બાબતની જાણ તેની માતાને કરી હતી.બાદમાં સોસાયટીના તમામ સભ્યોએ આસપાસ,પાર્કિંગમાં અને ટેરેસ પર તપાસ કર્યા બાદ પણ બાળકની ભાળ નહિ મળતાં પોલીસને જાણ કરી હતી.ઘટનાની ગંભીરતા જોતાં પોલીસ ઇન્સ્પેકટર સહિતની ટીમ ત્યાં દોડી ગઇ હતી.
સૌ પ્રથમ પોલીસે ફ્લેટમાં લાગેલા સીસીટીવી ફૂટેજની તપાસ કરી જેમાં માટે એક જ ગાડી ફ્લેટની બહાર અને થોડીવારમાં પરત આવી હોવાનું જાણવા મળ્યું હતું.જેથી પોલીસે અન્ય સીસીટીવી તપાસતા તે જ બાળકને કારની ડીકીમાં મૂકાતો હોવાનું નજરે પડ્યું હતું.જેના આધારે પોલીસે એ જ ફ્લેટના એ બ્લોકમાં રહેતા રાહુલ પટેલ નામના યુવકની પૂછપરછ કરી હતી.જેમાં તે ભાંગી પડ્યો હતો અને પોતે જ આ બાળકનું અપહરણ કરીને તેને માથાનાં પાછળના ભાગે ઈંટ મારી ઇજા પહોંચાડીને શીલજ નજીક અવાવરૂ જગ્યામાં ફેંકી આવ્યો હોવાની કબુલાત કરી હતી.જેથી પોલીસે તાત્કાલિક એક ટીમ ત્યાં રવાના કરતા બાળક બેભાન અને ઇજાગ્રસ્ત હાલતમાં મળી આવ્યો હતો.જેને પોલીસે તાત્કાલિક નજીકની હોસ્પિટલમાં સારવાર માટે મોકલી આપી આરોપી વિરૂદ્ધ અપહરણ અને હત્યાના પ્રયાસનો ગુનો દાખલ કરીને વધુ તપાસ શરૂ કરી છે.આરોપીની પૂછપરછમાં જાણવા મળ્યું છે કે,યુવક છેલ્લા કેટલાક સમયથી ભાડે રહે છે,પરંતુ હાલ કોઈ કામ ધંધો ન હોવાથી બેકાર છે.પૈસાની ખૂબ જ જરૂર હોવાથી તેણે પાડોશી બાળકનું અપહરણ કરી તેની પરિવાર પાસેથી મોટી ખંડણી પડાવવાનો પ્લાન ઘડ્યો હતો.
