અમદાવાદ,તા.14 એપ્રિલ 2022, ગુરૂવાર : તા.૧૩ એપ્રિલે નેશનલ ફાયર સર્વિસ ડે ઉજવવામાં આવ્યો.ફાયર સર્વિસના જવાનોને એક દિવસ યાદ કર્યા અને પછી બાર માસ ભુલી ગયા જેવી સ્થિતિ અમદાવાદમાં ઘડાઇ છે.અમદાવાદ મ્યુનિ.ફાયર સર્વિસના જવાનો આર્થિક શોષણનો ભોગ બની રહ્યા છે,સ્ટાફ ઘટ, ૨૪ કલાકની નોકરી,ઓછુ વળતર સહિતની અનેક મુશ્કેલીઓ વચ્ચે પણ ફાયર બ્રિગેડના જવાનો તેમની કામગીરી સુપેરે કરી રહ્યા છે.મ્યુનિ.તંત્રએ લોકોનો જીવ બચાવનાર ફાયર જવાનોના પરિવારનું પણ વિચારવું જોઇએ તેવી માંગણી ઉઠી છે.
ફાયર બ્રિગેડના જવાનોના જણાવ્યા મુજબ મહિનાનું વોશિંગ એલાઉન્સ તેમને ફક્ત ૩૦ રૂપિયા મળે છે, છેલ્લા પાંચ વર્ષથી યુનિફોર્મ પણ અપાયો નથી, ૮ કલાકથી વધારે નોકરી ન કરવાનો મજુર કાયદો હોવા છતાંય તેઓએ ૨૪ કલાક માટે સેવા પર હાજર રહેવાની ફરજ પડાઇ રહી છે.વધારાના જે ૧૬ કલાક રોકવામાં આવે છે તેના મહિને ફક્ત ૩૨૫ રૂપિયા જ વળતર અપાય છે.લોંગર ડયુટી અને રિસ્ક એલાઉન્સ ફક્ત ૩૨૫ રૂપિયા એ મજાક સમાન છે.કોર્પોરેશન બહારના વિસ્તારમાં જવાનું થાય તો ફાયર જવાનને ૮ કલાકના ૩૦ રૂપિયા અને ઓફિસરને ૩૫ રૂપિયા મળે છે.આગ સિવાયની કામગીરી માટે ૮ કલાકના ૭૦ રૂપિયા અને ઓફિસરને ૧૦૦ રૂપિયા જેવું નજીવું વેતન અપાઇ રહ્યું છે. આગ, રેસ્ક્યુ સહિતની કામગીરીમાં ફાયર જવાનનું મોત થાય તો તેના પરિવારજનોને ફક્ત દોઢ લાખ રૂપિયાની સહાય મળે છે.નવાઇની વાત એ છેકે અપંગ સહાય તો મળતી જ નથી.ફાયર બ્રિગેડના જવાનોના જણાવ્યા મુજબ અગાઉ ૩ ડેપ્યુટી મ્યુનિ.કમિશનરોની કમિટી બનાવીને રિપોર્ટ અપાયો હતો કે જવાનો પાસે ફક્ત ૮ કલાક કામ કરાવવું જોઇએ પરંતુ જો તેનો અમલ કરવા જાય તો ત્રણ ઘણો સ્ટાફ ભરતી કરવો પડે તેવી સ્થિતિ હોઇ તેનો અમલ કરાઇ રહ્યો નથી.સુરત અને વડોદરામાં ૮ અને ૧૨ કલાકની નોકરીનો નિયમ છે. જ્યારે અમદાવાદમાં તેનું પાલન થતું નથી. અમદાવાદમાં ફાયર જવાનોની ઘટ છે,વર્કશોપમાં સ્ટાફ નથી, વાયરલેસમાં ફક્ત ૩ થી ૪ સ્ટાફ છે,કોમ્યુનિકેશન ઓફિસર,આસી,વાયરલેસ ઓફિસર,રેડિયો મિકેનીક,ફોરમેન,હેડ મિકેનીક,વેલ્ડર,સુથાર,લુહાર, ઇલેક્ટ્રીશિયનની જગ્યાઓ ખાલી પડી છે. ચીફ ફાયર ઓફિસર,એડી.ચીફ ફાયર ઓફિસર,બે ડેપ્યુટી ચીફ ફાયર ઓફિસર, સ્ટેશન ઓફિસર,સહ સ્ટેશન ઓફિસર સહિતની મહત્વની જગ્યાઓ પણ ખાલી પડી છે.એટલું જ નહીં ફાયરબ્રિગેડની ગાડીઓ હંકારતા ૧૦૦ ડ્રાઇવરોની પણ જગ્યા ખાલી પડી રહી છે. દર વર્ષે રાષ્ટ્રીય અગ્નિશમન ડે ઉજવીને એક દિવસ માટે ફાયરના જવાનોને સલામ કરવાને બદલે તેઓ અને તેમના પરિવાર માટે કંઇક નક્કર કરવું જોઇએ,ફાયર જવાનો ચિંતા વગર,તમામ પ્રકારના સાધનોથી સજ્જ બની,તમામ સરકારી સવલતો મેળવી શકે તેવી સુખસુવિધા પુરી પાડીને તેમને મજબુત કરવા જોઇએ તેવી માંગણી ઉઠી છે.
