આપણે ખૂબ આકરા દિવસો માટે તૈયાર રહેવું પડશેઃ સ્પેન વડાપ્રધાન
એજન્સી, મેડ્રિડ
સ્પેનમાં 22 માર્ચને રવિવારે કોરોના વાયરસથી 394 લોકોના મોત થયાની સરકારે જાહેરાત કરી છે. ઈટાલી બાદ યુરોપમાં કોરોના વાયરસથી સૌથી વધુ અસરગ્રસ્ત આ દેશમાં મૃતકોની સંખ્યા 1720 થઈ ગઈ છે. શનિવારની તુલનામાં મૃત્યુઆંકમાં 30 ટકાનો વધારો થયો છે.
સ્પેનના સ્વાસ્થ્ય વિભાગના આંકડા અનુસાર કોરોના વાયરસની પુષ્ટિના કેસોની સંખ્યા 3646 વધી છે, અર્થાત 14.6 ટકાના વધારા સાથે કુલ કેસોની સંખ્યા 28572 થઈ ગઈ છે. અધિકારીઓએ આગામી દિવસોમાં કોરોના વાયરસના કેસોની સંખ્યા વધવા અંગેની ચેતવણી આપી છે. 1785 લોકો ગંભીર રીતે સારવાર કરાવી રહ્યા છે. સ્પેનના વડાપ્રધાન પેડ્રો સાન્ચેજે શનિવારે રાત્રે ચેતવણી આપી કે કોરોના વાયરસની પરિસ્થિતિ સ્પેનમાં હજુ ખરાબ થઈ શકે છે.
શનિવારે રાત્રે દેશને સંબોધિત કરતી વખતે પેડ્રો સાન્ચેજે કહ્યું કે, આપણે સ્વયંને ભાવનાત્મક અને મનોવૈજ્ઞાનિક રીતે ખૂબ કઠિન દિવસો માટે તૈયાર રહેવું જોઈએ. સ્પેને પોતાના 46 મિલિયન નાગરિકો માટે લોકડાઉનની જાહેરાત કરી છે. આમ, સ્પેનવાસીઓને ફક્ત જરુરી કમ, ભોજન સંલગ્ન ખરીદી, દવા કે હોસ્પિટલ લક્ષી કામ અને પાલતુ શ્વાનને ચાલવા લઈ જવાની મંજૂરી આપવામાં આવી છે.
અત્રે ઉલ્લેખનીય છે કે, વિશ્વભરમાં કોરોના વાયરસથી 13 હજાર લોકોના મોત થયા છે અને એક અબજની વસ્તી પોતાના ઘરોમાં કેદ છે, જેમાં રવિવારનો ભારતનો જનતા કર્ફ્યૂ પણ સામેલ છે. કોરોના વાયરસથી સૌથી વધુ પ્રભાવિત ઈટાલીએ પોતાના કારખાના બંધ કરી દીધા છે. આ મહામારીના કારણે દુનિયાના 33 દેશોએ લોકડાઉનની જાહેરાત કરી છે.
