અમદાવાદ : તા.12 જુન 2022 : નવ નિર્મિત ઓઢવ પોલીસ સ્ટેશનની હાલત કબાડી ખાના જેવી થઇ ગઇ છે.વિવિધ કેસમાં પોલીસે જપ્ત કરેલા તમામ પ્રકારના વાહનોના ખડકલાથી પોલીસ સ્ટેશનનું પ્રાંગણ આખું ભરાઇ ગયું છે.મુલાકાતીઓના વાહનો પાર્ક કરવાની પણ જગ્યા રહી નથી!સફાઇ,દેખરેખના અભાવે ધૂળ ખાઇને,તાપમાં તપીને,વરસાદમાં પલળીને આ વાહનો ભંગારમાં ફેરવાઇ ગયા છે.શહેરના દરેક પોલીસ સ્ટેશનમાં આવી દશા જોવા મળે છે.સ્માર્ટસિટીના સ્માર્ટ પોલીસ સ્ટેશનની આવી દશા!જપ્ત કરાયેલા વાહનો માટે અલાયદી વ્યવસ્થા કરીને પોલીસ સ્ટેશનોને વાહનોના કાટમાળમાંથી મુક્ત કરવા જોઇએ તેવી શહેરીજનોની માંગણી છે.
પૂર્વ અમદાવાદની વાત કરીએ તો પોલીસ સ્ટેશનો પહેલી નજરમાં ભંગારી વાહનોનો વાડો હોય તેવું જોવા મળે છે.આ સ્થિતિના કારણે અનેક સમસ્યાઓ સર્જાઇ રહી છે.પોલીસ સ્ટેશનમાં પાર્કિંગની જગ્યા રહેતી નથી.જપ્ત કરાયેલા વાહનોની સાચવણી કરવી પડે છે.પોલીસ સ્ટેશના પ્રાંગણમાં ગંદકી થાય છે.ખાસ કરીને ચોમાસામાં વાહનોની આજુબાજુ ઘાસ ઉગી નીકળે છે.મચ્છર-માખીનો ઉપદ્રવ થાય છે.ગંદકીના કારણે રોગચાળો ફેલાય છે.
કરોડો રૂપિયાના ખર્ચે નવા બનાવાયેલા પોલીસ સ્ટેશનનો કોઇ અર્થ રહેતો નથી.સામાજીક કાર્યકર સુરેશભાઇ ટાંકના જણાવ્યા મુજબ સરકારે આ દિશામાં વિચારવું જોઇએ અને એક પોલીસી બનાવીને જપ્ત કરાયેલા વાહનોને સાચવીને રાખવા માટે અલાયદી વ્યવસ્થા કરવી જોઇએ.અથવા તો જપ્ત કરાયેલા વાહનોને લગતા કેસોનો ઝડપી નિકાલ થાય તેવા પ્રયાસો કરીને વાહનો તેના માલિકને જલદી મળી જાય તેવા પ્રયાસો કરવા જોઇએ.આમેય પોલીસ સ્ટેશનમાં વર્ષો સુધી પડયા રહ્યા બાદ વાહનો ચલાવવા લાયક રહેતા નથી.ભંગારમાં ફેરવાઇ જાય છે.પોલીસે જપ્ત વાહનોનું ભારણ લઇને ફરવું પડે છે બીજી બાજુ વાહન માલિકને વાહન હવે ક્યારે છુટીને પરત આવશે તેની ચિંતા રહે છે.
