– જમાલપુરમાં દબાણને લઈ મહિલા અને પોલીસ વચ્ચે ઘર્ષણ
– પોલીસે મહિલાઓને માર મારતાં શહેરમાં રોષ
– ભાજપના આગેવાનોએ પ્રાથમિક સભ્યપદેથી આપ્યું રાજીનામું
નવસારી : નવસારીના જમાલપુર વિસ્તારમાં સર્વોદય સોસાયટીમાં ગેરકાયદે બનેલા રાધાકૃષ્ણ મંદિરનું દબાણ હટાવવા દરમિયાન પોલીસે મહિલાઓને માર મારતાં શહેરમાં રોષ જોવા મળી રહ્યો છે.જેને લઈને સ્થાનિકો દ્વારા વિશાળ રેલી કાઢી વિરોધ પ્રદર્શન કરવામાં આવ્યું હતું.સાથે જ આજે સર્વોદય સોસાયટીમાં રહેતા ભાજપના આગેવાનો સહિત લોકોએ સામુહિક રીતે ભાજપના પ્રાથમિક સભ્યપદેથી રાજીનામું જિલ્લા ભાજપ પ્રમુખને સુપરત કર્યું હતું.
નવસારીના જમાલપુર વિસ્તારમાં સર્વોદય સોસાયટીની પાછળ આવેલી જમીનના માલિક અને સોસાયટી વચ્ચે રોડ બાબતે ઝઘડો થયો હતો.જેમાં સમાજે ગેરકાયદેસર રીતે મંદિર બનાવી રાધાકૃષ્ણની મૂર્તિઓની પૂજા શરૂ કરી હતી.ફરિયાદ નોંધાયા બાદ કલેક્ટર કોર્ટમાં મામલાની સુનાવણી હાથ ધરાતા ગેરકાયદેસર મંદિરનું બંધ હટાવવાનો આદેશ આપવામાં આવ્યો હતો.જેને ધ્યાનમાં રાખીને 25મી જુલાઈની સાંજે નુડાના અધિકારીઓ મહાનગરપાલિકાના કર્મચારીઓ અને પોલીસ કાફલા સાથે સોસાયટીમાં પહોંચ્યા હતા અને મંદિરને હટાવવાનો પ્રયાસ કર્યો હતો,જે દરમિયાન સમાજના લોકો વિરોધ પર ઉતરી આવ્યા હતા.જે બાદ પોલીસે બળપ્રયોગ કર્યો હતો.આ સાથે જ વિરોધ કરી રહેલી મહિલાઓને બળજબરીથી મંદિરની બહાર ધકેલી દેવામાં આવી હતી.પોલીસની હાજરીમાં મંદિરનું અતિક્રમણ હટાવવામાં આવ્યું હતું. જેથી મહિલાઓ પર થયેલા અત્યાચાર સામે સ્થાનિકો દ્વારા કેન્ડલ માર્ચ સાથે દેખાવો કર્યો હતો.એટલું જ નહિ પણ ભાજપના આગેવાનો સહિત 1100 લોકોએ સામુહિક રીતે ભાજપના પ્રાથમિક સભ્યપદેથી રાજીનામું જિલ્લા ભાજપ પ્રમુખને સુપરત કર્યું હોવાનું સ્થાનિકોએ જણાવ્યું હતું.
