– ટેક્ટ્રોનિક પર નફામાં ચેડાં કરવાનો તેમજ હિસાબોમાં ગોટાળાનો આરોપ
નવી દિલ્હી, તા.28 ફેબ્રુઆરી-2023, મંગળવાર : હોંગકોંગમાં અદાણી-હિન્ડેનબર્ગ જેવો કિસ્સો બહાર આવ્યો છે.ટેક્ટ્રોનિક ઇન્ડસ્ટ્રીઝના સહસ્થાપક અને ચેરમેન હોર્સ્ટ જુલિયસ પુડવિલની નેટવર્થમાં બે દિવસમાં જ ~૫,૫૦૦ કરોડ (૬૭ કરોડ ડોલર)થી વધુનું ધોવાણ થયું છે.હિન્ડેનબર્ગની જેમ ઓછા જાણીતા શોર્ટ-સેલરે કંપની પર નફામાં ચેડા કરવાનો તેમજ હિસાબોમાં ગોટાળાનો આરોપ મૂક્યો હતો.
ટેક્ટ્રોનિકના શેરમાં ગુરુવારે જાન્યુઆરી ૨૦૧૨ પછીનો સૌથી મોટો દૈનિક ઘટાડો નોંધાયો હતો.કંપનીનો શેર હોંગકોંગ સ્ટોક એક્સ્ચેન્જ પર લગભગ ૧૯ ટકા તૂટ્યો હતો.શુક્રવારે બપોરના સત્ર સુધીમાં શેરમાં નીચલા સ્તરથી થોડો સુધારો નોંધાયો હતો.શેર અગાઉના દિવસની તુલનામાં ૫.૩ ટકા વધીને ૭૮.૯ હોંગકોંગ ડોલરના સ્તરે હતો.ફોર્બ્સ રિયલ-ટાઇમ બિલિયોનેર્સ લિસ્ટ અનુસાર પુડવિલની નેટવર્થ હવે ૪.૫ અબજ ડોલર રહી છે.
ટેક્ટ્રોનિકને શોર્ટ-સેલર જેહોશાફેટ રિસર્ચ દ્વારા ટાર્ગેટ કરવામાં આવી હતી.તેણે ગુરુવારે ૬૦ પાનાંનો અહેવાલ જારી કરીને આરોપ મૂક્યો હતો કે, હોંગકોંગની કંપનીએ એક દાયકાથી હિસાબમાં ગોટાળા કરી નફાને નોંધપાત્ર પ્રમાણમાં વધારીને દર્શાવ્યો છે.શોર્ટ-સેલરે ટેક્ટ્રોનિકના ૨૦૨૩ના પરિણામ ‘બહુ ખરાબ’ જાહેર થવાનો અંદાજ વ્યક્ત કર્યો છે.તેણે કંપનીના શેરમાં ૬૦-૮૦ ટકા ઘટાડાની ભીતિ દર્શાવી છે.ટેક્ટ્રોનિકે ગુરુવારે સ્ટોક એક્સ્ચેન્જને જણાવ્યું હતું કે, કંપની અહેવાલમાં દર્શાવેલા તમામ આરોપોને સ્પષ્ટપણે નકારે છે.આરોપો અપમાનજનક,એકતરફી,ચોકસાઇવિહોણા અને અધૂરા નિવેદનો સાથેના છે.કંપની જેહોશાફેટ અને/અથવા આરોપો માટે જવાબદાર અને અહેવાલ પ્રકાશિત કરનાર વિરુદ્ધ કાનૂની પગલાં લેવાનો હક અનામત રાખે છે.
વિશ્લેષકોના જૂથે ટેક્ટ્રોનિકનો બચાવ કર્યો છે.જે પી મોર્ગને અહેવાલમાં જણાવ્યું છે કે, ટેક્ટ્રોનિકના નફાના માર્જિનમાં સુધારો થઈ રહ્યો છે.બેટરીથી ચાલતી કોર્ડલેસ પ્રોડક્ટ્સમાં વહેલું રોકાણ તેમજ સાનુકૂળ પ્રોડક્ટ સાઇકલ સહિતના પરિબળોને કારણે કંપનીના નફાનું માર્જિન વધી રહ્યું છે.ડાઇવા કેપિટલ માર્કેટ્સે જેહોશાફેટના મોટા ભાગના દાવાને ખોટા ગણાવ્યા છે અને કહ્યું છે કે, ટેક્ટ્રોનિક તેમનો પસંદગીનો શેર છે.કંપનીએ શુક્રવારે ટિ્વટર પર જણાવ્યું હતું કે, સાયબર હુમલાને પગલે તેની વેબસાઇટ કામચલાઉ ધોરણે બંધ રહી હતી.
