છેલ્લા ત્રણ દાયકા કરતાં વધુ સમયથી ભાજપના કબજાવાળી ઓલપાડ વિધાનસભા બેઠક પર આ વખતે ત્રિકોણીયો જંગ જોવા મળશે.આ બેઠક ઓબીસી અને તેમાં પણ કોળી પટેલ બહુમતિ સાથે પાટીદાર મતદારો ધરાવતી બેઠક છે.આ બેઠક પર આપ ની એન્ટ્રી છે તેથી
તે કોના મતને કેટલું નુકસાન પહોંચાડે છે તેના પર ઓલપાડ બેઠકનું ગણિત ગણાઈ રહ્યું છે.આ બેઠક સહકારી ક્ષેત્રમાં છે અને ભાજપ- કોંગ્રેસના ઉમેદવાર સહકારી ક્ષેત્રમાં હોવાથી તેઓ વચ્ચે પણ ગળાકાપ સ્પર્ધા રહે તેવી શક્યતા નકારી શકાતી નથી.કોળી પટેલ સાથે ઓબીસી મતદારોનું પ્રભુત્વ ધરાવતી ઓલપાડ બેઠકમાં મોટા વરાછા,કોસાડ વિગેરે વિસ્તારનો સમાવેશ થતાં પાટીદાર મતદારો પણ નોંધપાત્ર વધ્યા છે.આ બેઠક પરથી ભાજપના મંત્રી મુકેશ પટેલને રીપીટ કર્યા છે. જ્યારે કોંગ્રેસ જિલ્લા પંચાયતના માજી વિરોધ પક્ષ નેતા અને સહકારી અગ્રણી દર્શન નાયકને ઉમેદવાર જાહેર કર્યા છે.આ બેઠકમાં એક લાખ જેટલા પાટીદાર મતદારો છે અને હાલ આ મતદારોનો ઝોક આપ પર હોવાથી આપે પાટીદાર અનામત આંદોલન સમિતિના નેતા ધાર્મિક માલવિયા ઓલપાડ બેઠક પર ઉમેદવાર જાહેર કર્યા છે.
૨૦૧૭માં ઓલપાડ વિધાનસભા બેઠક પરથી ભાજપના મુકેશ પટેલને ૬૨૮૨૮ મતથી વિજય થયો હતો.. જોકે, આ વખતે કોંગ્રેસના જ એક નેતાએ કોંગ્રેસ વિરોધમાં કામ કર્યું હતું તેથી ભાજપની લીડ વધી હતી તેમ કહેવાય છે.આ વખતે ધાર્મિક માલવિયા મેદાનમાં છે તેઓને ઓલપાડ કાંઠા વિસ્તારના મતદારો સ્વીકારે છે કે કેમ તે મોટો પ્રશ્ન છે.પાટીદાર મતદારો આપ- કોગ્રેસ અને ભાજપમાં વહેચાય છે તો ઓલપાડ વિસ્તારના ઓબીસી મતદારોનો ઝોક આ વખતે ક્યા પક્ષ સાથે રહે છે તે મહત્વનું બની રહેશે.
ગુજરાતના બીજા મુખ્યમંત્રી હિતેન્દ્ર પટેલ ઓલપાડ વિધાનસભા બેઠકે આપ્યા હતા
સુરતની ઓલપાડ વિધાનસભા બેઠક છેલ્લા ત્રણ દાયકા કરતાં વધુ સમયથી ભાજપનો ગઢ બની છે.આ બેઠક પર ગુજરાતના બીજા મુખ્યમંત્રી હિતેન્દ્ર પટેલ બન્યા હતા તેઓ
ઓલપાડ બેઠક પરથી ચૂંટણી લડયા હતા અને જીત્યા હતા.આ ઉપરાંત ઓલપાડ બેઠક પરથી ભાજપના ભગુ વિમલ જીત્યા હતા ત્યાર બાદ શંકરસિંહ વાઘેલાએ ભાજપમાં બળવો કરી પોતાની સરકાર રચી ત્યારે ભગુ વિમલને મંત્રીપદ પણ અપાયું હતું.ત્યારબાદ છેક હાલમાં ભુપેન્દ્ર પટેલની સરકારમા ઓલપાડ ધારાસભ્ય મુકેશ પટેલને મંત્રી બનાવાયા છે.આ વખતે તેઓ ત્રીજી ટર્મ માટે ચૂંટણી લડશે.
