– મધ્યપ્રદેશના પોલીસ અધિકારીનું અનુકરણ કરીને ગુજરાતના પોલીસના ઓવરવઇટ ઓફિસરો તેમજ કર્મચારીઓ પણ ફીટ થઇ શકે છે
મધ્યપ્રદેશના એક આઇપીએસ ઓફિસર દેશ અને ગુજરાતના એવા પોલીસ ઓફિસરો માટે મિસાલ બન્યાં છે કે જેમનું શારીરિક વજન 100 કિલોગ્રામ કે તેનાથી વધુ છે.આ ઓફિસરે માત્ર આઠ મહિનામાં કોઇપણ મેડિસીન કે જીમના પ્રયોગ વિના 43 કિલોગ્રામ વજન ઉતાર્યું છે.તેઓનું વજન 134 કિલોગ્રામ હતું.આ કામ તેમણે નેશનલ પોલીસ એકેડેમીમાં કર્યું છે.મધ્યપ્રદેશના આઇપીએસ વિવેક રાજસિંહ કુકરેલે પોલીસ એકેડેમીમાં જોડાયા હતા.તેમણે કઠોર ટ્રેનિંગ પછી વજન ઉતાર્યું છે.સોશ્યલ મિડીયા પ્લેટફોર્મના માધ્યમથી આ ઓફિસરે બીજા અધિકારીઓ અનુકરણ કરે તે માટે પોસ્ટમાં વજન પહેલાંના અને ઘટેલા વજન સાથેના ફોટોગ્રાફ મૂક્યાં છે.તેમણે વજન ઉતારવા માટે શું કર્યું તે ફેસબુક પોસ્ટ પર મૂક્યું છે.તેમણે લખ્યું છે કે મને મહેસૂસ થતું હતું કે છેલ્લા કેટલાક વર્ષોથી ઓવરવેઇટના કારણે મુશ્કેલી પેદા થતી હતી.સ્વાસ્થ્ય પર ખરાબ અસર પડી હતી. વજન વધતાં બ્લડપ્રેશરની બિમારી શરૂ થઇ હતી પરંતુ એકેડેમીમાં વજન ઉતારવા માટે મને મોટી ઉપલબ્ધી મળી છે.વોકિંગની સાથે હું કસરત પણ કરતો હતો.
તેમણે લખ્યું છે કે છેલ્લા કેટલાક વર્ષોમાં નોકરી દરમ્યાન મારૂં વજન 138 કિલોગ્રામ થઇ ગયું હતું. હું ખાવાનો શોખિન છું.હું માનું છું કે ખોરાકને ફેંકી દેવો ન જોઇએ.આ મારૂં આદર્શ વાક્ય છે.સમય વિના ખાવાનું અને પેટ ભરીને જમતો હોવાથી મારૂં વજન વધી રહ્યું હતું.વજન ઉતારવા માટે મેં વોકિંગ શરૂ કર્યું હતું જેના કારણે વજનમાં ઘટાડો થયો છે.એ ઉપરાંત પ્રોપર ડાયટનું પણ પાલન કર્યું છે.મારૂં વજન ઉતરતાં મારૂં બ્લડપ્રેશર નોર્મલ છે અને મારી રેસ્ટિંગ પલ્સ રેટ 40 બીપીએમ છે.
ગુજરાતના પોલીસ વિભાગના એક ઉચ્ચ અધિકારીએ કહ્યું હતું કે ગુજરાતમાં જે પોલીસ અધિકારી કે કર્મચારીઓ ઓવરવેઇટ છે અને જેમનું વજન વધારે છે તેઓએ મધ્યપ્રદેશના આ પોલીસ ઓફિસર જેવું કઠીન કાર્ય કરવું જોઇએ.રાજ્યમાં પોલીસ એકેડેમી છે ત્યારે તેનો લાભ લઇને પોલીસ વિભાગના અધિકારીઓ તેમજ કર્મચારીઓએ ફીટ રહેવું હિતાવહ છે કે જેથી તેઓ બમણાં જુસ્સાથી કામ કરી શકે.
