બારડોલી : બારડોલી તાલુકાના નવી કીકવાડ ગામના ગભાણ ફળીયામાંથી 10 જૂનના રોજ એક લવારુંનો શિકાર કરનાર દીપડી ગત રાત્રે પાંજરે પુરાય હતો.દીપડી બે વર્ષની હોવાનું વનવિભાગે જણાવ્યું હતું. મળતી માહિતી મુજબ નવી કીકવાડ ગામના ગભાણ ફળીયામાં રહેતા નવીન શંકર ચૌધરીના ઘરની પાછળથી ગત 10મી જુનના રોજ દીપડો લવારું(બકરીનું બચ્ચું)નો શિકાર કરી ગયો હતો.
નવીનભાઈએ બારડોલીની ફ્રેન્ડ્સ ઓફ એનિમલ વેલ્ફેર ટ્રસ્ટની ટીમને જાણ કરતા પ્રમુખ જતીન રાઠોડે વનવિભાગની સાથે મળી મારણ સાથે પાંજરું ગોઠવ્યું હતું.દરમ્યાન 25મી જુનની રાત્રે નવીનભાઈ તેમના ઘરની પાછળ આવેલા ખેતરમાં ખાતરની ગુણ મુકવા માટે ગયા હતા ત્યારે એક દીપડો તેમની સામે આવી ગયો હતો.દીપડાને જોતા જ નવીનભાઈ ઘર તરફ ભાગી ગયા હતા જ્યારે દીપડો ખેતરમાં જતો રહ્યો હતો.
રાત્રીના લગભગ 1 વાગ્યાની આસપાસ નવીનભાઈ ફરી બેટરી લઈને જોવા ગયા તો દીપડો પિંજરામાં પુરાયો હતો.જાણ થતાં જ વનવિભાગ અને ફ્રેન્ડ્સ ઓફ એનિમલની ટીમ સ્થળ પર આવી પહોંચી હતી. વનવિભાગે કબ્જો લેતા તે એક દીપડી હોવાનું સામે આવ્યું હતું અને તેની ઉંમર આશરે બે વર્ષ હોવાનું જણાવ્યું હતું.
