અમદાવાદ : શહેરના સોલામાંથી બે હજારના દરની હાઇક્વોલિટી નકલી 56 નોટ સાથે પકડાયેલા દિલીપ કેશવાલાની જામીન અરજી એડિશનલ સેશન્સ જજ ડી.ડી.ઠક્કરે ફગાવી દીધી છે.કોર્ટે નોંધ્યુ છે કે, આરોપી સામે ગંભીર પ્રકારનો ગુનો છે,હાલમાં તપાસ ચાલુ છે.ત્યારે હાલના તબક્કે આરોપીને જામીન પર મુક્ત કરવો હિતાવત નથી.તેથી આરોપીના જામીન રદ કરવા ન્યાયોચિત જણાય છે.
ઘાટલોડિયામાં રહેતા 20 વર્ષીય દિલીપ કેશવાલાને બે હજારના દરની 56 ચલણી નોટ સાથે ક્રાઇમ બ્રાન્ચે ધરપકડ કરીને જેલમાં મોકલી આપ્યો હતો.દરમ્યાનમાં આરોપી દિલીપ કેશવાલાએ જામીન મેળવવા માટે અરજી કરી એવી રજૂઆત કરી હતી કે,હું નિર્દોષ છું,ખોટી રીતે સંડોવી દેવામાં આવ્યા છે,કોર્ટ પાસે જામીન આપવાની સત્તા છે અને કોર્ટ જામીન આપે તો તમામ શરતોનું પાલન કરવા તૈયાર છું તેથી જામીન પર મુક્ત કરવો જોઇએ.
અરજીનો વિરોધ કરતા સરકારી વકીલે કોર્ટને જણાવ્યું હતુ કે,આરોપી દિલીપ કેશવાલા મૂળ પોરબંદરનો અને ઘાટલોડિયામાં પીજીમાં રહીને કમ્પ્યુટર એન્જિનિયરિંગમાં અભ્યાસ કરતો હતો.છ મહિના અગાઉ પૈસાની જરૂરિયાત ઊભી થતાં દિલીપે ક્વીકર નામની એપ્લિકેશનમાં નોકરી માટે બાયોડેટા અપલોડ કર્યો હતો.આરોપી કુરિયર તેમજ ઓનલાઇન પોર્ટલ નામની એપ્લિકેશન મારફતે દિલીપને બે હજારની નકલી ચલણી નોટ મોકલતો હતો.
દિલીપ લાલચમાં આવીને તેણે આરોપીના કહ્યા પ્રમાણે હાઇક્વોલિટીની રૂ.બે હજારની ડુપ્લિકેટ ૪૨ ચલણી નોટથી ગુરુકુલ રોડ પર આવેલા પૂજારા ટેલિકોમમાંથી એપલ-૧૩ મોબાઇલ ખરીદ્યો હતો.જે ચલણી નોટ ટેલિકોમના માલિકે બેંકમાં જમા કરાવી હતી.પરંતુ મશીનમાં નોટ નકલી હોવાનું સામે આવતા બેંકે તાત્કાલિક દર્શન પટેલને જાણ કરીને તમામ નકલી નોટ જપ્ત કરી હતી.હાલમાં તપાસ ચાલુ છે ત્યારે આરોપીને જામીન પર મુકત કરવો જોઈએ નહીં.ત્યારબાદ કોર્ટે આરોપીની જામીન અરજી ફગાવી દીધી છે.
