સુરત : સચિન SEZના યુનિવર્સલ ડાયમંડ યુનિટે મીસ ડેકલેરેશન કરીને રૃા.204 કરોડના રીયલ ડાયમંડને માત્ર રૃા.25 લાખના દર્શાવ્યા હતા લેબગ્રોન ડાયમંડના નામે ઓરજીનલ ડાયમંડના મીસ ડીકલેરેશન અને ઓવર વેલ્યુએશન કરીને આચરવામાં આવેલા 204 કરોડની કિંમતના ડાયમંડ નિકાસ કૌભાંડમાં કસ્ટમ એક્ટના ભંગ બદલ જેલવાસ ભોગવતા સચીનના સ્પેશ્યલ ઈકોનોમિક ઝોન સ્થિત એસઈઝેડ યુનિટ મે.યુનિવર્સલ જેમ્સના શકદાર સંચાલક મીત કાછડીયાના જામીનની માંગને એડીશ્નલ સેશન્સ જજ અનિલ આર.મલિકે નકારી કાઢી છે.
સુરતના સચીનના સ્પેશ્યલ ઈકોનોમિક ઝોનમાં આવેલા મે.યુનિવર્સલ જેમ્સના શકદાર સંચાલક મીત કાછડીયાના મે-2021 લેબગ્રોન ડાયમંડના આડમાં ઓરીજીનલ ડાયમંડના બે કન્સાઈન્મેન્ટને સુરત કસ્ટમ વિભાગે જપ્ત કર્યા હતા.શકદાર મીત કાછડીયાએ મીસ ડેકલેરેશન તથા ઓવરવેલ્યુએશન કરીને કુલ 204 કરોડની કિંમતના ડાયમંડ એક્સપોર્ટ કૌભાંડ આચર્યું હોઈ કસ્ટમ વિભાગે શકદારની એકાદ વર્ષ બાદ દિલ્હી એરપોર્ટ પરથી ધરપકડ કરી જેલભેગો કર્યો હતો.
હાલમાં જેલવાસ ભોગવતા મીત કાછડીયાએ જામીન માટે માંગ કરી હતી.જેની સુનાવણી દરમિયાન બચાવપક્ષે મુખ્યત્વે એવો બચાવ કર્યો હતો કે શકદારની ખોટી રીતે ગુનામાં સંડોવણી કરવામાં આવી છે.નેચરલ અને લેબ ગ્રોન ડાયમંડ વચ્ચે ફર્ક દર્શાવતી કોઈ ટેકનોલોજી હાલ ઉપલબ્ધ નથી.હાલમાં ડાયમંડનો મુદ્દામાલ કસ્ટમ પાસે જપ્ત હોઈ શકદારને જામીન આપવાથી સાક્ષી પુરાવા સાથે ચેડા થવાની સંભાવના નથી.જેના વિરોધમાં કસ્ટમ વિભાગ તરફે ખાસ નિયુક્ત સરકારી વકીલ ધર્મેન્દ્ર પ્રજાપતિએ જણાવ્યું હતું કે શકદારે 2 કરોડની કિંમતના લેબગ્રોન ડાયમંડ દર્શાવીને તેની આડમાં 204 કરોડની કિંમતના નેચરલ ડાયમંડના એકસપોર્ટ કરતાં ઝડપાયા છે.ભૂતકાળમાં શકદારે 30 કન્સાઈમેન્ટ આ જ પ્રકારની મોડસ ઓપરેન્ડીથી વિદેશમાં નિકાસ કરી સરકારી તિજોરીને કરોડો રૃપિયાનું નુકશાન પહોંચાડયું છે.
શકદારને લેપટોપ તથા ત્રણ મોબાઈલ ફોનના ડેટા અંગે એફએસએલ નો રિપોર્ટ બાકી છે.હાલમાં કરોડો રૃપિયાના મીસડેકલેરેશન તથા ઓવર વેલ્યુએશન કરીને નિકાસ કરવામાં આવેલા ડાયમંડ એકસપોર્ટ કૌભાંડની તપાસ નાજુક તબક્કામાં છે.જેથી મોટા પાયા પર આર્થિક ગુનો આચરનાર શકદારને જામીન આપવાથી સાક્ષી પુરાવા સાથે ચેડા થવા તથા તપાસ પર વિપરિત અસર પડે તેવી સંભાવના છે.જેને કોર્ટે માન્ય રાખી શકદારના જામીનની માંગ નકારી કાઢતા જણાવ્યું હતું કે શકદારના કબજામાં નેચરલ ડાયમંડ કઈ રીતે આવ્યા તેની ઉંડાણપુર્વક તપાસ જરૃરી છે.શકદારે અગાઉ 30 કન્સાઈમેન્ટ વિદેશમાં નિકાસ કર્યાની કબૂલાત કરી હોઈ સમગ્ર કૌભાંડની તપાસ હાલમાં નાજુક તબક્કામાં છે.
