નવી દિલ્હી : વડાપ્રધાન નરેન્દ્ર મોદીએ કોરોના વાયરસ રોગચાળાને પહોંચી વળવા જાહેરાત કરેલા 20 લાખ કરોડના આર્થિક પેકેજ માટે નાણામંત્રી નિર્મલા સીતારામણ આજે (15 મે, શુક્રવારે) સતત ત્રીજા દિવસે મીડિયા સમક્ષ આવ્યા હતા.તેમણે આજે આર્થિક પેકેજમાં ખેડુતો અને ગ્રામીણ ભારતને આપવામાં આવેલી રાહતો વિશે વિસ્તૃત માહિતી આપી હતી.
આ દરમિયાન નાણામંત્રીએ કહ્યું કે,કૃષિના માળખાગત સુવિધા માટે એક લાખ કરોડ રૂપિયાની જોગવાઈ કરવામાં આવી છે.તેમણે ખેડુતોને લગતી 8 જાહેરાતો કરી હતી.નાણામંત્રીએ કહ્યું હતું કે,લોકડાઉન દરમિયાન પણ ખેડૂતોએ કામ ચાલુ રાખ્યું.નાના અને મધ્યમ ખેડૂત 85 ટકા વાવેતર ધરાવે છે. નાણામંત્રીએ કહ્યું કે, આપણે કઠોળના ઉત્પાદનમાં વિશ્વમાં ત્રીજા અને શેરડીના ઉત્પાદનમાં બીજા સ્થાને છીએ.નાણામંત્રી નિર્મલા સીતારામણે ફૂડ એન્ટરપ્રાઇઝ માઇક્રો સાઇઝ માટે 10,000 કરોડ રૂપિયાની જાહેરાત કરી.તેમણે કહ્યું કે,ફૂડ એન્ટરપ્રાઇઝ માઇક્રો સાઇઝ માટે 10 હજાર કરોડ આપવામાં આવશે.આ અંતર્ગત 10 હજાર કરોડ રૂપિયા ક્લસ્ટર આધારે આપવામાં આવશે જેથી તેઓ વૈશ્વિક ધોરણના ઉત્પાદનો બનાવી શકે.
મંત્રીએ કહ્યું કે,આનાથી સુખાકારી,હર્બલ,ઓર્ગેનિક વગેરે ઉત્પાદનોનું ઉત્પાદન કરતા 2 લાખ માઇક્રો ફૂડ સાહસોને લાભ થશે.ઉદાહરણ તરીકે,બિહારમાં મખાના ઉત્પાદનો,કાશ્મીરમાં કેસર,કર્ણાટકમાં રાગીનું ઉત્પાદન,ઉત્તર પૂર્વમાં ઓર્ગેનિક ફૂડ,તેલંગાણામાં હળદરનું ઉત્પાદન વધશે.નિર્મલા સીતારામણે કહ્યું કે,વડાપ્રધાન મોદીનું વિઝન વોકલ ફોર લોકલ માટેના હેતુથી 2 લાખ માઇક્રો ફૂડ એંટરપ્રાઇઝને મદદ કરવા માટે એક યોજના શરૂ કરવામાં આવશે.આરોગ્ય અને સલામતીના ધોરણોમાં સુધારો,છૂટક બજારોમાં એકીકરણ જેવા મુદ્દા પર ફોકસ કરવામાં આવશે.
