ઉત્તર ગુજરાતના સહકારી ક્ષેત્રના આગેવાન નટુકાકાના અવસાનથી શોક

મહેસાણા,તા.૨૨
સહકારી ક્ષેત્રમાં વર્ષોથી મહત્વપૂર્ણ યોગદાન આપી અનેક સંસ્થાઓમાં ટોચના હોદ્દાઓ ભોગવનાર મહેસાણાના નટુભાઈ પટેલનું ટૂંકી માંદગી બાદ શનિવારના રોજ અમદાવાદ ખાતેની ખાનગી હોસ્પિટલમાં અંતિમ શ્વાસ લીધા હતા. તેમના અવસાનને પગલે ઉત્તર ગુજરાતના સહકારી આલમમાં શોકનો માહોલ છવાઈ ગયો હતો. મૃતદેહને અમદાવાદથી મહેસાણા ખાતે તેમના નિવાસસ્થાને લાવવામાં આવ્યો હતો. જ્યાં સ્વર્ગસ્થના દર્શનાર્થે મોટી સંખ્યામાં સહકારી અને રાજકીય આગેવાનો સહિત શહેરીજનો ઉમટયા હતા.
મહેસાણા શહેરના પરા વિસ્તારમાં રહેતા નટુભાઈ પિતાંબરદાસ પટેલ તેમેના વિસ્તારમાં આવેલી સહકારી મંડળીના રાજકારણથી પોતાની કારકિર્દીનો પ્રારંભ કર્યો હતો. જોતજોતામાં તેમણે રાજકીય અને સહકારી ક્ષેત્રની લાંબી સફર પાર કરીને પોતાનું વિશેષ યોગદાન પુરું પાડયું હતું. ગુજકોમાસોલ, ઈફ્કો, મહેસાણા ડિસ્ટ્રીક્ટ બેંક, માર્કેટયાર્ડ જેવી અનેક સહકારી સંસ્થાઓમાં ચેરમેન તરીકે કામગીરી બજાવી છે. સ્વર્ગસ્થ આત્મારામ પટેલના અવસાન બાદ રાજ્યમાં સહકારી આલમમાં એકહથ્થુ શાસન ભોગવ્યું હતું.