આજથી વિધાનસભાનાં બજેટ સત્રનો પ્રારંભ

ટ્રમ્પની મુલાકાત પાછળના કરોડોના ખર્ચને લઇને કોંગ્રેસ વિધાનસભામાં સરકારને ઘેરે તેવી શક્યતા, સવા બે લાખ કરોડનું બજેટ રજૂ થવાની શક્યતા
ગાંધીનગર,તા.૨૫
ગુજરાત વિધાનસભાના બજેટ સત્રનો વિરામ બાદ આજે ૨૬મીથી પ્રારંભ થઇ રહ્યો છે. આ અગાઉની બેઠકમાં કેન્દ્રના સીએએ કાયદાને સમર્થન માટે સત્ર બોલાવાયું ત્યારે બજેટ સત્રના ભાગરૂપે ૧૦ જાન્યુઆરીના રોજ રાજ્યપાલ આચાર્ય દેવવ્રતે ગૃહને સંબોધન કર્યુ હતું. આવતીકાલે ૨૬મીએ નાણામંત્રી નીતિન પટેલ વર્ષ ૨૦૨૦-૨૧ના નાણાંકિય વર્ષની બજેટ રજૂ કરશે. જે અંદાજે સવા બે લાખ કરોડનું હોવાનો અંદાજ છે. ૨૨ વર્િંકગ દિવસોમાં ૨૫ બેઠકો યોજાશે. અમેરિકાના રાષ્ટ્રપતિ ડોનાલ્ડ ટ્રમ્પની અમદાવાદ મુલાકાતને લઇને ખાસ કરીને તેમની સરભરા અને કાર્યક્રમ માટે ખર્ચાયેલા કરોડો રૂપિયાને લઇને કોંગ્રેસ ભાજપ સરકારને ભીંસમાં લેવાનો પ્રયાસ કરે તેમ છે.
સૂત્રોએ જણાવ્યું કે આજથી શરૂ થઈ રહેલા બજેટ સત્રના પ્રથમ દિવસે નાણાંમંત્રી નીતિન પટેલ વર્ષ ૨૦૨૦-૨૧નું અંદાજપત્ર રજૂ કરશે. જે ગત વર્ષની સરખામણીમાં ૧૮ હજાર કરોડના વધારા સાથે ૨ લાખ ૨૨ હજાર કરોડનું હોવાની ચર્ચા છે. આ બજેટમાં રાજ્ય સરકાર નાણાંકીય સંતુલનની સાથે રાજ્યની અમદાવાદ સહિતની અન્ય મહાનગર પાલિકાઓની ઓક્ટોબર માસમાં યોજાનાર ચૂંટણીને ધ્યાનમાં રાખીને વેરા વધારાની દરખાસ્ત રજૂ ન કરે એવી શક્યતાઓ છે. આ બજેટમાં નર્મદા યોજના, સૌની યોજનાઓ માટે નાણાંકિય ફાળવણી સહિત રોજગારીની સાથે કૃષિ અને નાના ઉદ્યોગો માટેની ખાસ યોજનાઓની જાહેરાત પણ થઈ શકે છે.
સૂત્રોએ કહ્યું કે, ગત વર્ષે લોકસભા ચૂંટણી હોવાથી ફેબ્રુઆરીમાં ૪ મહિના માટે ૬૪ હજાર કરોડનું લેખાનુદાન લીધુ હતું અને જુલાઈમાં વર્ષ ૨૦૧૯-૨૦૨૦નું પૂર્ણ બજેટ રજૂ થયું હતું. આ બજેટનું કદ ૨ લાખ ૪ હજાર કરોડ રૂપિયા હતું. આ બજેટ ગુજરાતના ઈતિહાસમાં પ્રથમવાર ૨ લાખ કરોડ સુધી પહોંચ્યું હતું. જો કે આ વર્ષે બજેટના કદમાં કરકસરને ધ્યાનમાં રાખીને ૨૦ હજાર કરોડનો વધારો થવાની શક્યતા છે. જેને કારણે ૨૦૨૦-૨૧નું અંદાજપત્ર ૨ લાખ ૨૨ હજાર કરોડ સુધી પહોંચે એવી સંભાવના છે. ગુજરાત સરકારની મુખ્ય આવક જીએસટીની છે, જેમાં ઉત્તરોતર વધારો થતો જાય છે. પરંતુ કેન્દ્ર સરકાર પાસેથી ગુજરાતને મળવાપાત્ર કરોડો રુપિયાની ઓછી મળતી હોવાથી નાણાંકીય સંતુલન જાળવવા સરકારે ભાર મુકવો પડશે.