નવી દિલ્હી : લશ્કરીમાં ટોચના હોદ્દાનો ઉલ્લેખ કર્યા વગર ટોચના ભૂતપૂર્વ આર્મી ઓફિસરે 2016માં પનામા પેપર્સ જારી થયા બાદ સેશેલ્સ ઇન્ટરનેશનલ બિઝનેસ કંપની (IBC)ની સ્થાપના કરી હતી,એમ પેન્ડોરા પેપર્સના રેકોર્ડના તપાસ અહેવાલમાં એક વર્તમાનપત્રે દાવો કર્યો છે.લેફ્ટનન્ટ જનરલ (નિવૃત) રાકેશ કુમાર લૂમડાએ તેમના પુત્ર રાહુલ લૂમડા સાથે સેશેલ્સમાં ડિસેમ્બર 2016માં રેરિન્ટ પાર્ટનર્સ લિમિટેડ નામની કંપનીનું રજિસ્ટ્રેશન કરાવ્યું હતું. 2010માં નિવૃત્ત થયા ત્યારે લેફ્ટનન્ટ જનરલ લૂમડા ડિરેક્ટર જનરલ ઓફ મિલિટરી ઇન્ટેલિજન્સ (DGMI)ની સંવેદનશીલ પોસ્ટ ધરાવતા હતા. તે પહેલા તેઓ થ્રી કોર્પના જનરલ ઓફિસર હતા.
સેશેલ્સના માહે ખાતેની વિદેશી સર્વિસ પ્રોવાઇડર કંપની આબોલના ગુપ્ત દસ્તાવેજના તપાસ અહેવાલમાં બહાર આવ્યું છે કે લૂમડાની કંપની મોરેશિયસ એબીસી બેન્કિંગ કોર્પોરેશન સાથે લિન્ક્ડ બેન્ક એકાઉન્ટ ધરાવતી હતી.મોરેશિયસ એબીસી બેન્કિંગ કોર્પોરેશનમાં રેરિન્ટ પાર્ટનર્સના ડિરેક્ટર્સ તરીકે આ પિતા અને પુત્રે કંપનીની અંદાજિત વાર્ષિક ડિપોઝિટ અને ટર્નઓવર અંગે 10 લાખ ડોલરનો અંદાજ આપ્યો હતો.આ એકાઉન્ટ ડિસેમ્બર 2016માં ખોલવામાં આવ્યું હતું અને તેમાં પ્રારંભિક ડિપોઝિટ 1 લાખ ડોલરની હતી.બેન્ક એકાઉન્ટ ઓપનિંગ ફોર્મમાં દર્શાવ્યા મુજબ જણાવ્યા અનુસાર સેશેલ્સની કંપની કન્સલ્ટન્સીનો બિઝનેસ કરે છે અને તેનો વાર્ષિક ખર્ચ આશરે 5 લાખ ડોલર છે.
સેશેલ્સની કંપનીમાં ત્રણ વ્યક્તિના હસ્તાક્ષર લિન્ક્ડ હતા.લૂમડા પિતા પુત્ર ઉપરાંત રેરિન્ટ પાર્ટનરના ત્રીજા ડિરેક્ટર અનંત ઘનશ્યામ છે. તેઓ નવી દિલ્હીના વસંત વિહારમાં રહે છે.આ ત્રણેય વ્યક્તિઓનું પ્રથમ ડિરેક્ટર અને કંપનીની લાભાર્થી માલિક તરીકે નામ છે.આ કંપનીનો 34 ટકા હિસ્સો ઘનશ્યામ પાસે છે.આ ઉપરાંત રાકેશ કુમાર લૂમડા અને રાહુલ લૂમડા પ્રત્યેક પાસે 33 ટકા હિસ્સો હતો.આ ત્રણેય વ્યકિતએ કંપની ઓપનિંગ અને મોરેશિયસ બેન્ક એકાઉન્ટ ઓપનિંગ ફોર્મમાં હસ્તાક્ષર કર્યા હતા.
