– અરજદાર રિલાયન્સ ઇન્ડસ્ટ્રી અને નિરમા લિ.ને મોટી રાહત આપતો સિમાચિહ્નરૂપ ચુકાદો
– રાજ્ય સરકારને કાયદામાં સુધારા કરવાની સત્તા પરંતુ એ સુધારા ગેરવાજબી કે મનસ્વી પ્રકારના ન હોવા જોઇએઃ હાઇકોર્ટ
અમદાવાદ,
ગુજરાત VATની ધારા 84Aને ગેરવાજબી,ગેરકાદેસર અને ગેરબંધારણીય ઠેરવીને તેને રદબાતલ કરવાનો સિમાચિહ્નરૂપ ચુકાદો હાઇકોર્ટના જસ્ટિસ જે.બી. પારડીવાલા અને જસ્ટિસ એ.સી.રાવની ખંડપીઠે આપ્યો છે.ખંડપીઠે ચુકાદામાં નોંધ્યું છે કે,‘આ મામલે થયેલી તમામ અરજીઓ ગ્રાહ્ય રાખવામાં આવે છે અને ગુજરાત VATની ધારા 84Aને ગેરબંધારણીય ઠેરવવામાં આવે છે.એટલું જ નહીં, આ ધારા બંધારણના સેવન્થ શિડ્યૂલની લિસ્ટ બેની એન્ટ્રી ૫૪ હેઠળ પણ એ રાજ્યની ધારાસભાની કાયદેસરની ક્ષમતાની બહારનો વિષય હોઇ તેને ગેરબંધારણીય ઠરાવવામાં આવે છે.પરિણામે અરજદારોને એ અન્વયે જે પણ નોટિસો વેટ વિભાગ દ્વારા પાઠવવામાં આવી છે એને પણ રદ કરવામાં આવે છે.’અરજદાર રિલાયન્સ ઇન્ડસ્ટ્રીઝ અને નિરમા લિ.ને આ ચુકાદાથી મોટી રાહત મળી છે.જ્યારે કે ચુકાદાની અમલવારી પર સ્ટેની રાજ્ય સરકારની માગ પણ ખંડપીઠે ફગાવી કાઢી હતી.
સૌરાષ્ટ્ર કેમિકલ્સ લિ. (નિરમા લિ.) અને રિલાયન્સ ઇન્ડસ્ટ્રીઝ લિ. દ્વારા આ સમગ્ર મામલે રિટ પિટિશન દાખલ કરવામાં આવી હતી અને વેટ વિભાગ દ્વારા આકારણી માટેની પાઠવવામાં આવેલી નોટિસો તથા VATની ધારા 84Aને પડકારવામાં આવી હતી.
કેસની હકીકત મુજબ VATના કાયદામાં એમેન્ડમેન્ટ કરીને ધારા 84Aનો સમાવેશ કરવામાં આવ્યો હતો.જે પાછલી અસરથી આકારણી માટેની કાર્યવાહીને અમલી બનાવતી ધારા હતી.આ ધારા મુજબ એડિશનલ કમિશનરે અરજદાર કંપનીને ફ્રેશ નોટિસ પાઠવી હતી અને નાણાકીય વર્ષ ૨૦૦૮-૦૯ની આકારણીમાં સુધારો કરી ઇનપુટ ટેક્સ ક્રેડિટને આઠ ટકા સુધી ઘટાડવાની કાર્યવાહી કરી હતી.જો કે પ્રસ્તુત કેસમાં સમયસીમાના તબક્કો ત્રણ વર્ષ એટલે કે ૩૦-૩-૧૩થી ૩૦-૩-૧૬ સુધીનો જ હતો. પરંતુ ધારા 84A અમલમાં આવતાં આ તબક્કાનો સમય ૧૮-૧-૧૩થી ૨૨-૯-૧૭ જેટલો થઇ ગયો હતો અને ત્રણ વર્ષની સમયસીમાનો અહીં છેદ ઊડી ગયો હતો. તેથી ધારા 84Aની બંધારણીયતાને પડકારતી રિટ કરાઈ હતી.
જસ્ટિસ પારડીવાલાની ખંડપીઠે ચુકાદામાં ઠરાવ્યું હતું કે,‘દેશના બંધારણના અનુચ્છેદ ૨૪૬એ મુજબ કેન્દ્ર અે રાજ્ય ગુડ્ઝ એન્ડ સર્વિસ ટેક્સ માટે અલગ-અલગ સત્તા મળતી નથી. કેમ કે GSTનો આશય જ ટેક્સના માળખામાં એકસૂત્રતાનો છે.’ સુપ્રીમ કોર્ટનો ચુકાદો ટાંકતા હાઇકોર્ટે નોંધ્યું હતું કે,‘રાજ્ય સરકારને ટેક્સ સહિતના કાયદામાં સુધારાવધારા કરવાની સત્તા છે,પરંતુ તે સુધારાવધારા ગેરવાજબી કે મનસ્વી ન હોવા જોઇએ.’
