મોલની લિફ્ટ મધરાતે ખોટકાતા ૯ લોકો અડધો કલાક ફસાયા

વડોદરા,તા.૨૫
વડોદરાના માંજલપુર વિસ્તારના મોલમાં ગઈ મધરાતે લિફ્ટ ખોટકાતા બે બાળક સહિત ૯ જણા અડધો કલાક સુધી ફસાયા હતા.
માંજલપુરના વ્રજધામ મંદિર પાસે આવેલા ઈવા મોલમાં ગઈ મધરાતે ફિલ્મનો છેલ્લો શો જોઈ ૫ યુવકો, ૨ યુવતી અને ૨ બાળકો લિફ્ટમાં નીચે ઉતરી રહ્યા હતા, ત્યારે ત્રીજા અને બીજા ફ્લોરની વચ્ચે લિફ્ટ બંધ થઈ હતી.
ફસાયેલા લોકોએ પ્રયત્ન કરવા છતાં લિફ્ટ ચાલુ નહિ થતા બુમરાણ મચાવી હતી. સિક્યુરિટી ગાર્ડ અને અન્ય લોકોએ લિફ્ટ ચાલુ કરવાના પ્રયત્નો કર્યા હતા, પરંતુ સફળતા મળી ન હતી.
બીજી તરફ અડધો કલાક સુધી લિફ્ટમાં ફસાયેલા લોકોના જીવ અધ્ધર થઇ ગયા હતા અને તેઓ પરસેવે રેબઝેબ થવા માંડયા હતા. જ્યારે બાળકોએ રોકકળ કરવા માંડી હતી. આખરે, ફાયર બ્રિગેડને જાણ કરાતા વડીવાડી ફાયર સ્ટેશનની ટીમ આવી ગઈ હતી અને ગણતરીની મિનિટોમાં ફસાયેલા લોકોને બહાર કાઢતા તેમના જીવમાં જીવ આવ્યો હતો