સુરત જિલ્લાના ઓલપાડ તાલુકાનાં કુડસદ ગામ નજીકથી સુરત જિલ્લા એસઓજી પોલીસ સ્ટાફના માણસોએ ત્રણ શખ્સને ઝડપી પાડી તેમની પાસેથી દેશી હાથ બનાવટની પિસ્તોલ તથા ચાર જીવતા કારતૂસ અને મોટરસાયકલ મળી કુલ 73 હજારનો મુદ્દામાલ કબ્જે કર્યો હતો. પકડાયેલ શખ્સો દાહોદથી પિસ્તોલ લાવ્યા હતા.
આ અંગે મળતી માહિતી અનુસાર સુરત જિલ્લા એસઓજી પોલીસ સ્ટાફના માણસો આજરોજ ઓલપાડ વિસ્તારમાં પેટ્રોલીંગમાં હતા તે દરમ્યાન પો.કો રણછોડભાઈ કાબાભાઈ તથા હે.કો દીપેશભાઈ હસમુખભાઇ નાઓને ખાનગી રાહે બાતમી મળી હતી કે એક કાળા કલરની સ્પ્લેન્ડર પ્લસ મો.સા નંબર જીજે-05-એસ.વાય-9320 પર ત્રણ ઇસમો ગેરકાયદેસર હથિયાર રાખી કોઈ ગુનાને અંજામ આપવા કારેલીથી કુડસદ થઈ પિપોદરા તરફ જવાના છે. જે હકીકતના આધારે એસઓજી પોલીસ સ્ટાફના માણસો કુડસદ ગામની સીમમાં રેલ્વે ફાટક નજીક વોચમાં હતા તે દરમ્યાન બાતમી મુજબની મોટરસાઇકલ પર ત્રણ ઇસમો આવતા તેને ઝડપી પાડ્યા હતા. અને તેમની પાસેથી એક દેશી હાથ બનાવટની પિસ્તોલ તથા ચાર જીવતા કારતૂસ કબ્જે કર્યા હતા. પોલીસે તેમની પૂછતાછ કરતાં તેમણે પોતાનું નામ રાહુલ સંજયભાઈ રાય (રહે, સાયણ નહેરકોલોની, તા-ઓલપાડ), વીરસિંગ હેમસિંગ મોહનીયા (રહે, સાયણ નહેર, કોલોની, તા-ઓલપાડ) તથા અનિશ અનવરભાઇ ગોહિલ (રહે, કુડસદ, મહાદેવ ફળિયું,) નાઓને ઝડપી પાડ્યા હતા. જ્યારે આ પિસ્તોલ આપનાર સરદારજીને વોંટેડ જાહેર કર્યો હતો. પોલીસે પકડાયેલ શખ્સો પાસેથી કુલ 73,900 નો મુદ્દામાલ કબ્જે કર્યો હતો..
દાહોદથી પિસ્તોલ અને કારતૂસ લાવવામાં આવી હતી
પકડાયેલ ત્રણ શખ્સો પૈકી વીરસિંગે દાહોદ બસ સ્ટેશનની બહાર ચાવી બનાવવાનું કામ કરતાં સરદારજી પાસેથી દેશી હાથ બનાવટની પિસ્તોલ તથા ચાર નંગ જીવતા કારતૂસ લીધા હતા. તેમજ પકડાયેલ શખ્સ પૈકી રાહુલ સંજય રાય એક વર્ષ અગાઉ ઓલપાડ પોલીસ સ્ટેશનના મારા મારીના ગુનામાં પકડાયેલ છે.
