વુહાનમાં અમુક પ્રતિબંધો હટાવાયા, લોકોને કામ પર જવાની છૂટ અપાઇ
એજન્સી, બેઇજિંગ
કોરોના વાયરસના ઉદગમ સ્થાન ચીને ઘાતક વાયરસ પર મહદ અંશે કાબૂ મેળવી લીધો હોવાનો દાવો કર્યો છે. ચીને તેના સૌથી પ્રભાવિત વુહાનમાં કેટલાક પ્રતિબંધો હટાવ્યાની જાહેરાત પણ કરી છે. વુહાનના લોકો 23 જાન્યુઆરીથી લોકડાઉનમાં છે. સોમવારે સતત પાંચમાં દિવસે પણ કોરોનાનો કોઇ કેસ સામે ન આવતા પ્રશાસને વુહાનને કેટલાક પ્રતિબંધોથી મુક્ત કર્યુ હતું.
ચીનના સ્વાસ્થ વિભાગના જણાવ્યા અનુસાર કોરોના વાયરસનો કોઇ નવો ઘરેલુ કેસ સામે આવ્યો નથી, પરંતુ બહારથી આવેલા 39 લોકો ચેપગ્રસ્ત હોવાનો ખુલાસો થયો છે. અહીં સુધી કે પ્રશાસને લોકોને કામ પર જવાની છૂટી પણ આપી દીધી છે અને જાહેર પરિવહન પર પ્રતિબંધો પણ હટાવી લેવામાં આવ્યા છે.
ચીનની સરકાર વાયરસ પર કાબૂ મેળવવા માટે વિદેશોથી આવનારા લોકોને અલગ રાખી રહી છે. અહીં મૃત્યુનો કુલ આંકડો 3270 છે. ચેપગ્રસ્ત દર્દીઓની સંખ્યા 81093 છે.
