– વડોદરા શહેર જિલ્લામાં કુલ ૨૭૯ કોરોનાગ્રસ્ત થયા : અત્યાર સુધી ૧૭ના થયા છે મોત
વડોદરા,
વડોદરામાં કોરોનાના સંક્રમિતોની સંખ્યામાં ઉત્તરોત્તર વધારો થઇ રહ્યો છે.કોરોના સામેના જંગમાં સચોટ ચિત્ર બહાર પાડવા સતત ઝઝૂમી રહેલા પત્રકારો પણ લપેટમાં આવવા લાગ્યા છે.વડોદરામાં આજે નવા સોળ કેસ આવ્યા છે.જેમાં સાત પત્રકારોનો સમાવેશ થતા સ્થાનિક પત્રકાર આલમમાં હડકંપ મચી ગયો છે.વડોદરામાં કુલ કોરોનાગ્રસ્તનો આંકડો ૨૭૯ પર પહોચી ગયા છે.સારવાર લઇ રહેલા બે કોરોનાગ્રસ્તના મોત પણ નીજપ્યા છે.તેની સાથે અત્યાર સુધી કુલ મોતની સંખ્યા ૧૭ પર પહોચી ગઇ છે.
આરોગ્ય વિભાગના સૂત્રોના જણાવ્યા અનુસાર વડોદરામાં આજે નવા આવેલા કેસમાં ગુલશન એપાર્ટમેન્ટ યાકુતપુરા,ડબી ફળીયા-પાણીગેટ,મરાઠી મહોલ્લો,નાગરવાડા,વાસણા રોડ,બ્રાઇટ સ્કૂલની ગલીમાં કારેલીબાગ,ક્રિષ્ણાપાર્ક સોસાયટી વાઘોડિયા રોડ,પાણીગેટ કાસમમિયાની મસ્જીદ પાસે,શેખ ફરીદ મહોલ્લા પાણીગેટ, મોગલવાડા વિસ્તારમાં બકરી પોળ,રાવપુરા વિસ્તારમાં કાછીયા પોળ,આજવા રોડના કમલાનગરનો સમાવેશ થાય છે.વડોદરા પ્રેસ ક્લબના સહયોગથી ગઇકાલે વડોદરા મ્યુનિસિપલ કોર્પોરેશનના આરોગ્ય વિભાગ દ્વારા પત્રકારોના સેમ્પલીંગ લેવામાં આવ્યા હતા.જેમાં ૬૨ પત્રકારોના ટેસ્ટ થયા હતા.જેના રિપોર્ટ આવી જતાં સાત પત્રકારોના કોરોના પોઝિટિવ આવ્યા હતા.આ સાતમાં ત્રણ પત્રકારો દિલ્હી સ્થિત તથા ચાર પત્રકારો સ્થાનીક હોવાનું બહાર આવ્યુ છે.આજે સવાર સુધી વડોદરામાં કુલ ૧૯૮ લોકોના સેમ્પલ લઇને ટેસ્ટ કરવામાં આવ્યા હતા.તેમાંથી ૧૮૨ના રિપોર્ટ નેગેટિવ હતા.
વડોદરામાં છેલ્લા ચોવીસ કલાકમાં બે કોરોનાગ્રસ્ત દર્દીઓના મોત નીપજ્યા છે.જેમાં બનીયન સિટી ડુપ્લેક્ષ ખાતે રહેતા ૬૬ વર્ષની મહિલા તથા વારસીયા ગુલશન એપાર્ટમેન્ટમાં રહેતા ૭૫ વર્ષની મહિલાનો સમાવેશ થાય છે.આમ અત્યાર સુધી વડોદરામાંથી કુલ ૧૭ કોરોનાગ્રસ્તના મૃત્યુ થયા છે.વડોદરાના ધી બરોડા ગ્રેઇન મર્ચન્ટર્સ એસો.દ્વારા હાથીખાના માર્કેટ ખાતે આજે વેપારીઓ તથા તેમના કર્મચારીઓના પણ ટેસ્ટ કરવામાં આવ્યા હતા.-
