સુરત,18 મે : કોરોના વાઇરસના સંકટ સમયમાં દેશમાં લાગુ થયેલા લોકડાઉનમાંના કપરા સમય દરમિયાન ગરીબ જરૂરિયાતમંદ કુટુંબો જીવનજરૂરિયાતની ચીજવસ્તુઓથી વંચિત ન રહી જાય તે માટે મહુવાના ધારાસભ્ય મોહનભાઈ ઢોડિયા ગરીબવર્ગની વ્હારે આવ્યા છે.તેમણે અવિરત સેવાકીય પ્રવૃત્તિને આગળ વધારતાં આજ રોજ મહુવા તાલુકાના 14 ગામોના વય વંદના,વૃધ્ધ સહાય,વિધવા સહાય યોજનાના કુલ 1203 લાભાર્થીઓને મરી મસાલો,ચા-ખાંડ, તેલ સહિતની જીવન જરૂરી ચીજવસ્તુઓની કીટનું વિતરણ કરવામાં આવ્યું હતું.આ અગાઉ તા.16મી ના રોજ મોહનભાઈ દ્વારા 16 ગામોના 971 લાભાર્થીઓને પણ કીટ વિતરણ કરવામાં આવ્યું હતું.લોકડાઉનમાં હજુ પણ ધારાસભ્ય દ્વારા જરૂરિયાતમંદ ગરીબ લાભાર્થીઓને કીટ વિતરણ કરવામાં આવશે.
મહુવા તાલુકાના શેખપુર,મૂડત,અંધાત્રી,વડીયા,ડુંગરી,નળધરા,કરચેલીયા,વાંસકુઈ,કઢૈયા,વાંક,વસરાઈ,પુના,બુટવાડા તેમજ અલગટ એમ કુલ 14 ગામોના કુલ કુલ 1203 લાભાર્થીઓને કીટ વિતરણ કરાયું હતું.ધારાસભ્યએ મુખ્યમંત્રી રૂપાણીના નેતૃત્વમાં કોરોના સંકટ વચ્ચે ગરીબો,વંચિતોની કાળજી લેવી એ રાજ્ય સરકારની પ્રાથમિકતા હોવાનું જણાવી લોકડાઉનના દિશાનિર્દેશો અને નિયમોનું પાલન કરી સરકારને સહયોગ આપવા અનુરોધ કર્યો હતો.આ સાથે ગ્રામજનોને સોશ્યલ ડિસ્ટન્સિંગ,માસ્ક પહેરવાનું મહત્વ અને સેનિટાઈઝરના ઉપયોગ સાથે વારંવાર હાથ ધોવાથી થતાં ફાયદા અંગે વિસ્તૃત સમજ આપવામાં આવી હતી.
