વલસાડ, 01 જુન : નાની દમણના ખારીવાડમાંથી શનિવારે રાત્રીએ દમણ પોલીસે મોપેડ ઉપર ગાંજો વેચવા નીકળેલા ત્રણ યુવકોને ઝડપી લીધા હતા. પોલીસે તેમની પાસેથી 1500 રૂપિયાનો 233 ગ્રામ ગાંજો કબજે લઇ કાર્યવાહી કરી છે.દમણ પોલીસને શનિવારે રાત્રીએ બાતમી મળી હતી કે,એક નંબર વગરની ટીવીએસ ઇન્ટો મોપેડ ઉપર સવાર યુવકો ગાંજાનું વેચાણ કરી રહ્યા છે.આ બાતમીના આધારે દમણ પોલીસે તપાસ કરતા ખારીવાડમાં મોપેડ ઉપર ગાંજા સાથે ફરી રહેલા ત્રણ યુવકો મહમદ ઝાફર ફારૂક મેમણ,જમાલ અબ્દુલ મન્નાન ખાન અને ફૈઝાન રહીમ મકાની ત્રણેય રહે.ખારીવાડ,નાની દમણની પૂછપરછ કરતાં તેમની પાસેથી 1500 રૂપિયાની કિંમતનો 233 ગ્રામ ગાંજાનો જથ્થો મળી આવ્યો હતો.પોલીસે ગાંજો અને મોપેડ કબજે લઇને ત્રણે યુવકની ધરપકડ કરી હતી.એનડીપીએસ એક્ટ મુજબ ગુનો નોંધી પોલીસે વધુ તપાસ હાથ ધરી છે.પોલીસે ગાંજાનો જથ્થો ક્યાંથી મેળવ્યો હતો અને કોને વેચાણ કરાતુ હતું એ દિશામાં તપાસ કરવા માટે આરોપીને કોર્ટમાં રજૂ કરી રિમાન્ડ મેળવવાની તજવીજ હાથ ધરી છે.
