રાજકોટ, તા. 1ર : ગુજરાત ટેકનોલોજીકલ યુનિ. દ્વારા આગામી તા.1 ડિસેમ્બરથી સેમેસ્ટર 3, પ અને 7ની પરીક્ષા લેવામાં આવનાર છે.તે પૂર્વે તા. 26 ઓકટોબરથી યુનિ.દ્વારા મેરીટ બેઈઝ પ્રમોશનના જાહેર કરાયેલા પરિણામમાં જે વિદ્યાર્થીઓને અસંતોષ રહ્યો હોય તેઓ માટે ખાસ કસોટી લેવામાં આવનાર છે.આ પરીક્ષા શાંતિપૂર્ણ વાતાવરણમાં લેવાય તે માટે યુનિ. દ્વારા કમ્મર કસી દેવામાં આવી છે.
આ અંગે ગુજરાત ટેકનોલોજીકલ યુનિ.ના કુલપતિ ડો.નવીનભાઇ શેઠે જણાવ્યું હતું કે યુનિ.દ્વારા આ પરીક્ષા કોવિડ-19ની ગાઇડલાઇન મુજબ જ લેવામાં આવશે.
તેમજ તા.15 ઓકટોબરથી 6 નવેમ્બર સુધીના સમયગાળામાં પ્રેકટીકલ પરીક્ષા પૂર્ણ કરવા માટે યુનિ. દ્વારા તમામ કોલેજોને પરિપત્ર યુનિ. દ્વારા ઇશ્યુ કરી આદેશ કરી દેવામાં આવેલ છે.ગુજરાત ટેકનોલોજીકલ યુનિ.નું દિપાવલી વેકેશન નવેમ્બરની તા.7 થી 18 સુધીનું રહેશે.
અહીં એ ઉલ્લેખનીય છે કે રાજ્યમાં એક માત્ર ગુજરાત ટેકનોલોજીકલ યુનિ. દ્વારા જ વિદ્યાર્થીઓને ઓનલાઇન અને ઓફલાઇન પરીક્ષાના વિકલ્પ આપવામાં આવેલ હતા અને સમયસર પરીક્ષા લેવામાં આવી હતી.
