– સૈયદપુરામાં રહેતી યુુવતીએ મુંબઈમાં રહેતા યુવક સાથે કર્યા હતા લગ્ન,પરંતુ સાસરે ગયાના 15 દિવસમાં જ બધા અરમાનો તૂટી ગયા
સુરત : માતા-પિતા હંમેશા સંતાનની ખુશી ઈચ્છતા હોય છે,અને તેના કારણે ક્યારેક સંતાન ભૂલ કરી બેસે તો પણ તેને માફ કરી દેતા હોય છે.જોકે,ક્યારેક સંતાનો જ પ્રેમમાં અંધ બની જાણેઅજાણે મોટી ભૂલ કરી દેતા હોય છે.આવું જ કંઈક થયું છે સુરતની એક યુવતી સાથે,જેણે માતાપિતાને કંઈ કહ્યા વિના મુંબઈના એક યુવક સાથે લગ્ન કરી લીધા હતા.લગ્ન બાદ યુવક-યુવતી પોતપોતાના ઘરે જ રહેતા હતા,પરંતુ એક દિવસ યુવતીનું મેરેજ સર્ટી તેના પરિવારજનોના હાથમાં આવતા ઘરમાં મોટી બબાલ થઈ ગઈ હતી.
સુરતના સૈયદપુરા વિસ્તારની વાવશેરીમાં રહેતી હેતલ (નામ બદલ્યું છે)ને મુંબઈમાં રહેતા યુવક વરુણ જુનજુનવાલા સાથે પ્રેમ થઈ ગયો હતો.બંનેએ લગ્ન પણ કરી લીધા હતા,પરંતુ આ અંગે પરિવારજનોને કોઈ વાત નહોતી કરી. બીજી તરફ,હેતલના પરિવારજનોને આ વાતની ખબર પડી જતાં તેમણે શરુઆતમાં વિરોધ કર્યો હતો,પરંતુ દીકરીની ખુશીમાં પોતાની ખુશી માનીને તેમણે આ સંબંધ સ્વીકાર્યો હતો.
માતાપિતાએ લગ્ન સ્વીકારી લેતા હેતલ એ વાતથી ખુશ હતી કે હવે તે સુખેથી પોતાનો સંસાર શરુ કરી શકશે.જોકે,તેના નસીબમાં કદાચ કંઈક અલગ જ લખાયેલું હતું.તે પોતાના સાસરે ગઈ તે સાથે જ તેને પતિની નશો કરવાની આદતની જાણ થઈ હતી.હેતલને વજાયનલ ઈન્ફેક્શન હોવા છતાં તેનો પતિ નશો કરીને તેની સાથે જબરજસ્તી શારીરિક સંબંધ બાંધતો હતો.હેતલની સ્થિતિ ના કહેવાય ના સહેવાય તેવી થઈ હતી,પરંતુ તે મૂંગા મોઢે બધું સહન કરી રહી હતી.જોકે,થોડા સમયમાં તેની સાસુ અને નણંદે તેને મ્હેણાં-ટોણાં મારવાનું શરુ કર્યું હતું.
હેતલના સાસુ અને નણંદ તને તારા બાપે ખાલી હાથે મોકલી દીધી છે તેવું કહી માનસિક ત્રાસ આપતા હતા.જેનાથી કંટાળીને હેતલ પોતાના પિયર આવી ગઈ હતી,પરંતુ થોડા સમયમાં જ સાસુ અને પતિ માફી માગી તેને ફરી તેડી આવ્યા હતા.જોકે,સમજાવટ બાદ સાસરે આવેલી હેતલને થોડા સમયમાં જ પાછું ત્રાસ આપવાનું શરુ કરી દેવાયું હતું.હદ તો ત્યારે થઈ ગઈ જ્યારે એક દિવસ ઘરમાં મોટો ઝઘડો થતાં સાસુએ ઘરમાં રહેવું હોય તો ભાડું આપવું પડશે તેમ કહી દીધું હતું.
અધૂરામાં પૂરું સાસુએ હું મારો હાથ જાતે જ કટ કરીને માથું ફોડી નાખીશ,અને પોલીસ ફરિયાદ કરી તને તેમાં ફસાવીને જેલભેગી કરી દઈશ તેવી ચિમકી આપતા હેતલ ડઘાઈ ગઈ હતી.સાસુએ પિયરમાં ગુંડા મોકલી હેતલના પિતાને ફટકારવાની પણ ધમકી આપી હતી.પતિ પણ હેતલને ત્રાસ આપતો હતો.હેતલ પોતાના ઘરે વાત ના કરી શકે તેટલા માટે તેનો ફોન પણ તોડી નખાયો હતો,અને એકવાર પતિએ બાઈક પર બેઠેલી હેતલને ફુટપાથ પર ફેંકી દેતા તેને પેનિક અટેક પણ આવી ગયો હતો.
દીકરીનો સંસાર બચાવવા માટે હેતલના માતાપિતા તેના સાસરે સમજાવટ માટે ગયા હતા.જોકે,હેતલના સાસરિયાએ તેમને પણ 50 લાખ રુપિયા દહેજ આપો તો તમારી દીકરીને રાખીએ તેમ કહીને તેમની સાથે જ હેતલને ઘરમાંથી કાઢી મૂકી હતી.આ મામલે હેતલે મહિલા પોલીસ સ્ટેશનમાં ફરિયાદ નોંધાવતા પોલીસે તેના સાસરિયા વિરુદ્ધ કાયદેસરની કાર્યવાહી શરુ કરી છે.
