કાબુલ : અફઘાનિસ્તાનના કુંદુજ પ્રાંતમાં શિયા સમુદાયને નિશાન બનાવીને મોટો હુમલો કરવામાં આવ્યો છે.શિયા સમુદાયની એક મસ્જિદમાં શુક્રવારે બપોરે ભયંકર વિસ્ફોટ થયો, જેમાં 100થી વધુ લોકો માર્યા ગયા છે.આ વિસ્ફોટ એ સમયે થયો હતો, જ્યારે બપોરના સમયની નમાજ માટે લોકો એકત્ર થયા હતા.આ હુમલા બાદ તાલિબાનના એક પોલીસ અધિકારીએ જણાવ્યું કે આ ધમાકામાં ઓછામાં ઓછા 100 લોકો માર્યા ગયા છે.
સોશ્યલ મીડિયા પર સામે આવેલા ફોટોમાં સ્પષ્ટ દેખાઈ રહ્યું છે કે મસ્જિદમાં દરેક જગ્યાએ લાશો પડેલી છે.બીજી તરફ, હોસ્પિટલના સૂત્રોથી એક ન્યૂઝ ચેનેલે પોતાના રિપોર્ટમાં કહ્યું કે ઓછામાં ઓછા 50 લોકોના મોત થયા છે.અહીંયા નોંધવું રહ્યું કે, હમણાં સુધી કોઈ સંગઠને હુમલાની જવાબદારી લીધી નથી.અફઘાનિસ્તાનમાં તાલિબાનના કબજા બાદથી અહીંયા ઇસ્લામિક સ્ટેટે હુમલા તેજ કરી દીધા છે.બંને સંગઠનોમાં વચ્ચે ટકરાવ ચાલું છે,જેના કારણે નિર્દોષ લોકો ભોગ બની રહ્યા છે.ગત રવિવારે કાબુલમાં પણ એક મસ્જિદની બહાર ધમાકો થયો હતો,જેમાં ઓછામાં ઓછા 12 લોકોના મોત થયા હતા અને 32 લોકો ઘાયલ થયા હતા.
