નવી દિલ્હી,તા.13 ઓકટોબર : દેશના સૌથી મોટા રાજ્ય યુપીમાં વિધાનસભાની ચૂંટણી કોંગ્રેસ પ્રિયંકા ગાંધીના સહારે લડશે તે સ્પષ્ટ છે.ચૂંટણી પહેલા જ પ્રિયંકાનો ધાર્મિક અવતાર દેખાઈ રહ્યો છે અને તેના પર ભાજપે ટિપ્પણી પણ કરી છે. પ્રિયંકા ગાંધીએ વારાણસીથી ચૂંટણી પ્રચારનો પ્રારંભ કર્યો તે પહેલા કાશી વિશ્વનાથ મહાદેવ અને અન્નપૂર્ણા મંદિરમાં દર્શન કર્યા હતા. પ્રિયંકા ગાંધીએ નવરાત્રીનુ વ્રત રાખ્યુ હોવાનુ પણ કોંગ્રેસનુ કહેવુ છે.
પ્રિયંકા ગાંધી ગળામાં રુદ્રાક્ષની માળા સાથે પણ નજરે પડ્યા હતા. જેના પર ભાજપે કોમેન્ટ કરી છે કે, વ્રત રાખ્યુ, જયજયકાર કર્યો અને રુદ્રાક્ષની માળા પહેરી છે.પ્રિયંકા ગાંધીએ યુપીમાં ચૂંટણી આવતા જ પોતાનો વેષ બદલી નાંખ્યો છે.તેની સાથે સાથે ભાજપે એક કાર્ટુન પણ શેર કર્યુ છે.જેમાં અરીસા સામે ઉભેલી પ્રિયંકાના ગળામાં રુદ્રાક્ષની માળા છે,માથા પર તિલક છે અને સાડી પહેરી છે.જેના પર તે ભગવો રંગ લગાવી રહી છે.સાથે સાથે પાછળ ઉભેલા સોનિયા ગાંધીને પ્રિયંકા કહે છે કે, બસ આ બધુ ચૂંટણી સુધી જ છે..મમ્મી.
