બારડોલી : 31મી ડિસેમ્બરને ધ્યાનમાં લઈ સુરત જિલ્લા પોલીસ દ્વારા જિલ્લામાં આવેલા અલગ અલગ ફાર્મ હાઉસ પર ચેકિંગ હાથ ધરવામાં આવ્યું હતું.જેને લઈને થર્ટીફર્સ્ટની પાર્ટી કરવા થનગની રહેલા લોકોમાં ફફડાટ વ્યાપી ગયો છે.
સુરત જિલ્લામાં આવેલા ફાર્મ હાઉસો પર 31મી ડિસેમ્બરના રોજ દારૂની મહેફિલ ન જામે તે માટે જિલ્લા પોલીસ વડા દ્વારા જિલ્લા એસઓજી અને એલસીબીની ટીમને ખાસ સૂચના આપવામાં આવતા જિલ્લા પોલીસ દ્વારા સઘન પેટ્રોલીંગ હાથ ધરવામાં આવી રહ્યું છે.બુધવારથી જ સુરત જિલ્લા એસઓજી અને એલસીબીની કુલ 7 ટીમો જિલ્લાના અલગ અલગ વિસ્તારોમાં ફરી ફાર્મ હાઉસોમાં ચેકિંગ હાથ ધરી રહી છે.આ ઝુંબેશ 31મી ડિસેમ્બર મોડી રાત સુધી ચાલુ રહેશે.પોલીસ દ્વારા કરવામાં આવી રહેલા સઘન પેટ્રોલીંગને લઈ હાલ ફાર્મ હાઉસ પર પાર્ટી કરવા માટે તૈયારી કરીને બેઠેલા લોકોમાં ફફડાટ વ્યાપી ગયો છે.જો કે પોલીસ દ્વારા કરવામાં આવેલ ચેકિંગ ઝુંબેશ કેટલી કારગત નીવડે છે તે જોવું રહ્યું.
